ДЕНСАУЛЫҚ САҚТАУ МИНИСТРЛІГІНДЕ ЖИ ҚОЛДАНЫЛАТЫН ЦИФРЛЫҚ ШЕШІМДЕР ТАЛҚЫЛАНДЫ
Денсаулық сақтау министрлігінде ведомство басшысы Ақмарал Әлназарова мен «Қазақтелеком» АҚ Басқарма төрағасы Бағдат Мусиннің қатысуымен жасанды интеллект қолданылатын цифрлық шешімдер талқыланды.
Ұсынылған жобалар медициналық персоналдың қауіпсіздігін арттыру, ауыл тұрғындары үшін медициналық көмектің қолжетімділігін кеңейту, сондай-ақ дәрігерлерге жүктемені азайту мәселелеріне қатысты болды.
Шешімдердің бірі Ақмола облысының бірқатар медициналық ұйымдарында сынақтан өтіп жатқан «ЖИ - терапевт» сервисі болды. Жүйе нақты уақыт режимінде дәрігер мен пациенттің арасындағы диалогты талдайды, алдын-ала диагнозды 80% дәлдікпен қалыптастырады және дәрігердің әдеттегі құжаттама уақытын 40%-ға дейін қысқартуға мүмкіндік береді.
Тағы бір инновациялық өнім — денсаулықты қашықтан бақылауды қамтамасыз ететін мобилдік телемедициналық қосымша. Оның көмегімен қазақстандықтар қысымды, импульсті, дене температурасын, қандағы оттегінің деңгейін және глюкозаны өлшей алады. Медициналық көмекке қолжетімділік шектеулі ауылдық жерлерде сервисті пайдалануға ерекше назар аударылады.
Сондай-ақ медицина қызметкерлерінің қауіпсіздігін арттыру үшін смарт-бейнежетондарды енгізу жобасы ұсынылды. Пилоттық режимде технология елордада бес жедел жәрдем бригадасында қолданылуда және жақын арада Алматыда іске қосу жоспарлануда. Құрылғылар қоңырауларды бейнетіркеуге мүмкіндік береді және төтенше жағдайларда жедел әрекет ету құралы ретінде қызмет етеді.
«Біз үшін медицина қызметкерлері үшін барынша қауіпсіз және тиімді жұмыс жағдайларын жасау маңызды. Күзет, шұғыл әрекет ету жүйелері және телемедицина ұйымдары бойынша жобалар денсаулық сақтау алдында тұрған сын-қатерлерге толық жауап береді. Біз бүкіл ел бойынша табысты цифрлық шешімдерді кеңейтуге дайынбыз», — деп атап өтті министр.
Өз кезегінде, «Қазақтелеком» АҚ Басқарма төрағасы Бағдат Мусин медициналық ұйымдарға аналитикамен бейнебақылау, қолжетімділікті бақылау жүйелері, дабыл батырмалары, полиция департаменттерінің жедел басқару орталықтарымен бейнетаспаны интеграциялау сияқты опцияларды қамтитын кешенді күзет жүйесін ұсынуға дайын екенін хабарлады.
Кездесу қорытындысы бойынша пилоттық жобаларды кеңейту және Қазақстанның медициналық инфрақұрылымын одан әрі цифрландыру туралы уағдаластыққа қол жеткізілді.