Т. СҰЛТАНҒАЗИЕВ МЕДИЦИНАЛЫҚ НЫСАНДАРҒА БАРЫП, СОЛТҮСТІК ҚАЗАҚСТАН ОБЛЫСЫНЫҢ ТҰРҒЫНДАРЫМЕН КЕЗДЕСУ ӨТКІЗДІ
ҚР Денсаулық сақтау бірінші вице-министрі Тимур Сұлтанғазиев Солтүстік Қазақстан облысына жұмыс сапары барысында денсаулық сақтау нысандарына барып, Қызылжар ауданының тұрғындарымен кездесіп, БАҚ брифингіне қатысты.
Т. Сұлтанғазиев көпбейінді облыстық балалар ауруханасының реанимация және оңалту бөлімшесіне барды. Мұнда 370 тәулік бойы және 30 күндік төсек базасында стационарлық және амбулаториялық көмектің барлық түрлері көрсетіледі.
Ауруханада реанимация, функционалдық және сәулелік диагностика бөлімшелерін, консультациялық-диагностикалық орталықты және т.б. қоса алғанда 10 клиникалық бөлімше жұмыс істейді.
Әрі қарай ол онкологиялық орталықтың сәулелік терапия бөлімшесінің жұмысымен танысты, онда сау тіндерге аз әсер ететін жоғары дәлдіктегі радиотерапияны қамтамасыз ететін жаңа сызықтық үдеткіш іске қосылды.
Әрі қарай вице-министр аудандық медициналық-санитарлық алғашқы көмек көрсету нысандарын аралады: Қызылжар ауданының «Рассвет» ЖП, Есіл ауданының «Чириковка» ФАП және Айыртау ауданының «Лобаново» дәрігерлік амбулаториясы, Тайынша ауданының «Келлеровка» ДА.
Сонымен қатар, ол Тайынша ауданындағы «Чкалово» ДА жанындағы балаларды оңалту орталығын жөндеу барысымен танысты.
«Ауылдық денсаулық сақтауды жаңғырту» ұлттық жобасын іске асыру шеңберінде өңірде 46 МСАК нысанының құрылысы аяқталғанын, Тайынша көпбейінді ауданаралық ауруханасы жаңғыртылып жатқанын, онда инсульт және кардиологиялық орталықтардың, медициналық оңалту, травматология, хирургия және қарқынды терапия бөлімшелері ашылғанын айта кеткен жөн. Бұл шаралар 55 мың ауыл тұрғынына қолжетімді медициналық көмек көрсетуге мүмкіндік береді.
Солтүстік Қазақстан облысының тұрғындары Денсаулық сақтау бірінші вице-министрімен кездесу барысында дәрі-дәрмекпен қамтамасыз етуге, медициналық қызметтердің қолжетімділігіне, жоспарлы вакцинациялауға және т.б. қатысты өзекті мәселелерді көтерді.
Кейін БАҚ-қа арналған брифинг шеңберінде Тимур Сұлтанғазиев емханалардың жұмысын жақсарту, дәрілік заттармен қамтамасыз ету және медицина қызметкерлерін өңірге тарту жөніндегі ағымдағы шараларға түсініктеме беріп, барлық өзгерістер медициналық қызметтердің қолжетімділігі мен сапасын арттыруға бағытталғанын атап өтті.
«Жүйелі шаралардың арқасында өңірде өмір сүру ұзақтығының оң өсуіне қол жеткізілді: 2023 жылы 73,13 жастан 2024 жылы 73,68 жасқа дейін. Сондай-ақ жарақаттан болатын өлімнің-8%-ға, тыныс алу ағзаларының ауруларынан-5%-ға төмендеуі тіркелді. Ағымдағы жылдың 5 айында ана өлімі тіркелген жоқ», - деді ол.
Өңірде 6,9 мың медицина қызметкері, оның ішінде 1,7 мың дәрігер және 5,2 мың орта медицина қызметкері жұмыс істейді. Алайда 315 дәрігер мен 496 мейіргердің тапшылығы сақталуда. Осыған байланысты медициналық білім беруді жетілдіру бойынша жұмыс жүргізілуде - атап айтқанда, гранттардың сараланған мөлшерін енгізу, оларды білім беру процесінің деңгейіне қарай бөлу жоспарлануда.
«Скринингтердің қолжетімділігін кеңейту мақсатында пациенттердің нысаналы тобының жасы 76 жасқа дейін ұлғайтылды. Төмен тығыздықтағы липопротеидтер, гликатталған гемоглобин, триглицеридтер сияқты жоғары сезімталдықты дәлелдеу сынақтары енгізілген. Сондай-ақ, 2025 жылдың екінші жартыжылдығынан бастап 50 жастан асқан ер адамдар үшін жедел цереброваскулярлық бұзылыстарды ерте диагностикалауға скрининг енгізіледі. Ағымдағы жылдың екінші жартысынан бастап онкоскринингтер медициналық көмектің кепілдік берілген көлемі шеңберінде сақтандырылмағандар үшін қолжетімді болады», - деп түсіндірді Т.Сұлтанғазиев.