Медициналық көмектің қауіпсіздігі мен сапасын қамтамасыз ету мақсатында медициналық ұйымға жүгінбес бұрын оның қызмет түрлеріне арналған рұқсат беру құжаттары мен мамандардың сертификаттарын алдын ала тексеруді ұсынамыз.
Емдеуді бастамас бұрын мына талаптарға назар аударыңыз:
• медициналық қызметті жүзеге асыруға берілген қолданыстағы лицензияның болуы;
• лицензияға қосымша – онда сізге қажетті медициналық көмектің түрі көрсетілуге тиіс;
• медициналық қызмет көрсетілетін мекенжай рұқсат беру құжаттарында көрсетілген мекенжайға сәйкес келуі керек;
• көрсетілетін қызметтердің құны, оларды ұсыну шарттары, ықтимал қарсы көрсетілімдер мен қауіптер.
Медициналық ұйымның лицензиясын лицензиялар мен рұқсаттардың мемлекеттік электрондық тізілімінен eLicense.kz арқылы тексеруге болады.
Дәрігерді немесе маманды таңдаған кезде мыналарды нақтылаңыз:
* медициналық білімінің болуы;
* дәрігердің мамандығы;
* клиникалық практикамен айналысуға құқық беретін қолданыстағы маман сертификатының болуы.
Мынаны есте ұстаған маңызды: диагноз қою немесе диагнозды болжамдау, талдау нәтижелерін түсіндіру, дәрілік препараттарды тағайындау немесе тоқтату, сондай-ақ емдеудің жеке схемасын әзірлеу медициналық қызметке жатады. Мұндай қызметтерді клиникалық практикаға жіберілген медицина қызметкері ғана көрсетуге құқылы.
Бұл талап әлеуметтік желілер мен интернет арқылы медициналық консультация беру кезінде де қолданылады.
Күмән туындаған жағдайда не істеу керек?
Шартты, түбіртектерді, тағайындауларды, медициналық қорытындыларды және маманмен немесе клиникамен болған хат-хабарларды сақтап қойыңыз.
Дәрігерлердің немесе медициналық ұйымның әрекеттеріне қатысты шағыммен ҚР Денсаулық сақтау министрлігінің Медициналық бақылау комитетінің аумақтық департаментіне, оның ішінде eOtinish жүйесі арқылы жүгінуге болады.
Қазақстан мен Қырғызстан арасындағы денсаулық сақтау саласындағы тәжірибе алмасу және ынтымақтастық шеңберінде Кардиология және ішкі аурулар ғылыми-зерттеу институтының рентгенэндоваскулярлық операциялық блогының меңгерушісі Алексей Колесников Бішкек қаласындағы академик М. Миррахимов атындағы Ұлттық кардиология және терапия орталығында мастер-класс өткізіп, күрделі тері арқылы жасалатын коронарлық араласуларды орындады.
Ұзақтығы 3 сағатқа созылған алғашқы операция коронарлық артериялардың дің бөлігінің күрделі зақымдануы бар 51 жастағы пациентке жасалды. Сол жақ коронарлық артерия діңінің зақымдануы High-Risk PCI – жоғары қауіп тобындағы тері арқылы жасалатын коронарлық араласулар санатына жатады. Сол жақ коронарлық артерия діңі сол жақ қарынша миокардының жалпы массасының 75%-дан 85%-ға дейінгі бөлігін қанмен қамтамасыз етеді. Сондықтан оның қатты тарылуы пациенттің өміріне тікелей қауіп төндіреді.
Операция барысында коронарлық артериялардың анатомиясы мен зақымдану сипатын егжей-тегжейлі бағалауға, араласудың оңтайлы стратегиясын анықтауға және оның тікелей нәтижесін бақылауға мүмкіндік беретін тамырішілік ультрадыбыстық зерттеу қолданылды. Екі стент сәтті имплантатталды.
Араласу кезінде сараптамалық эхокардиографиялық сүйемелдеуді КІА ҒЗИ-дың функционалдық және ультрадыбыстық диагностика саласындағы жетекші дәрігерлерінің бірі Бақыт Арыспаев қамтамасыз етті.
Жоғары дәлдіктегі трансэзофагеальдық эхокардиографиялық бақылаудың арқасында емшараның барлық кезеңінде пациенттердің барынша қауіпсіздігі қамтамасыз етілді.
Басқа мастер-кластар барысында қазақстандық мамандар Leave Nothing Behind («артынан ештеңе қалдырмау») заманауи коронарлық араласу бағытын да таныстырады. Бұл тәсіл дәрілік жабыны бар баллондарды (DCB) қолдануды көздейді. Жекелеген клиникалық жағдайларда бұл әдіс тұрақты металл стентін имплантацияламай-ақ коронарлық артериядағы қан ағымын қалпына келтіруге мүмкіндік береді.
Күрделі клиникалық жағдайларды талқылай отырып, интервенциялық араласулар қырғызстандық әріптестермен бірлесіп жүргізілуде.
Қазақстанның медицинасы күндері екі елдің медицина мамандарының арасында клиникалық тәжірибені тікелей алмасуға және одан әрі ынтымақтастықты дамытуға мүмкіндік беретін маңызды алаңға айналды.
Қазақстанда күзгі маусым басталғалы бері ЖРВИ жағдайлары өткен жылдың осы кезеңімен салыстырғанда шамамен екі есеге аз тіркелді. Тұмау жағдайлары тіркелген жоқ, сондай-ақ елде бұрын белгісіз болған жаңа респираторлық вирустар анықталған жоқ.
Денсаулық сақтау министрлігі қыркүйек айынан бастап ЖРВИ, тұмау және COVID-19 бойынша сырқаттанушылыққа апта сайын мониторинг жүргізіп келеді.
Қыркүйек айының басынан бері елде 51 937 ЖРВИ жағдайы тіркелді. Бұл өткен жылдың сәйкес кезеңіндегі көрсеткіштен 1,8 есеге төмен. Бүгінгі таңда тұмау жағдайлары тіркелген жоқ.
COVID-19 бойынша да төмендеу байқалады. 2026 жылдың басынан бері коронавирус инфекциясының 87 жағдайы тіркелді. Бұл 2025 жылдың сәйкес кезеңімен салыстырғанда 10,3 есеге аз.
COVID-19 басқа да маусымдық респираторлық вирустармен қатар айналымда жүр. Бұл ретте Қазақстанда бұрын белгісіз болған жаңа вирустар анықталған жоқ.
Күз мезгілінде респираторлық инфекциялардың айналымы дәстүрлі түрде күшейеді. Денсаулық сақтау министрлігі елдегі эпидемиологиялық жағдайды апта сайын бақылауды жалғастыруда.
Маусымдық инфекциялардан өзіңізді қалай қорғауға болады?
ЖРВИ, тұмау және басқа да респираторлық инфекциялардың профилактикасы үшін:
* үй-жайларды үнемі желдетіп тұру;
* қолды жиі жуу және жеке гигиена ережелерін сақтау;
* мүмкіндігінше ауру белгілері бар адамдармен тығыз қарым-қатынастан аулақ болу;
* сырқаттанушылық жоғары кезеңде адамдар көп жиналатын орындарға баруды шектеу;
* жөтелгенде және түшкіргенде ауыз бен мұрынды майлықпен немесе шынтақтың бүгілген жерімен жабу;
* дене қызуы көтеріліп, жөтел, тамақ ауруы және басқа да ауру белгілері пайда болған жағдайда үйде қалып, дер кезінде медициналық көмекке жүгіну ұсынылады.
Қарапайым профилактикалық шараларды сақтау маусымдық респираторлық инфекцияларды жұқтыру және олардың таралу қаупін азайтуға көмектеседі.
Қазақстандық дәрігерлер Қырғыз Республикасында өтіп жатқан Қазақстан медицинасы күндері аясында қырғызстандық әріптестерімен бірлесіп, сүт безінің қатерлі ісігіне шалдыққан пациенттерге операция жасап жатыр.
Ұлттық ғылыми онкология орталығының атынан клиникалық жұмыс жөніндегі басқарушы директор Азат Чиналиев пен онкохирург Александр Дигай қатысуда. Жұмыс бағдарламасы Бішкектегі Ұлттық онкология және гематология орталығының базасында ұйымдастырылды.
Жұмыс күні қазақстандық және қырғызстандық дәрігерлердің бірлескен таңғы жоспарлау отырысынан басталды. Мамандар клиникалық жағдайларды талқылап, пациенттердің тексеру нәтижелерін қарады және алдағы емдеу тактикасын айқындады. Одан кейін жұмыс операциялық бөлмеде жалғасты.
Бағдарлама аясында сүт безінің қатерлі ісігі диагнозы қойылған пациенттерге төрт операция жасау жоспарланған. Онкохирург Александр Дигай заманауи хирургиялық тәсілдерді қолдану тәжірибесімен бөлісуде. Бұл әдістер ісікті алып тастауға, ал медициналық көрсетілімдер мүмкіндік берген жағдайда, сүт безін сақтап қалуға немесе оны қайта қалпына келтіруге мүмкіндік береді.
Операция барысында дәрігерлер ісік үдерісінің лимфа түйіндеріне таралған-таралмағанын анықтауға мүмкіндік беретін технологияны да қолданады. Бұл хирургиялық емнің қажетті көлемін дәлірек таңдауға және медициналық тұрғыдан қажет болмаған жағдайда, ауқымды операция жасаудан бас тартуға мүмкіндік береді.
Жоспарланған алғашқы операция сәтті аяқталды. Қазақстандық және қырғызстандық хирургтер бірлескен жұмысты жалғастыруда.
Практикалық жұмыс басталмас бұрын Ұлттық ғылыми онкология орталығының мүмкіндіктері таныстырылды. Азат Чиналиев ҰҒОО клиникалық қызметі, ғылыми және білім беру бағыттары, сондай-ақ екі елдің медициналық ұйымдары арасындағы ынтымақтастықты одан әрі дамыту перспективалары туралы айтып берді.
«Біз үшін кәсіби тәжірибе алмасудың практикалық форматы ерекше маңызды. Біз ҰҒОО қолданылатын технологиялар туралы айтып қана қоймай, әріптестерімізбен бірге клиникалық жағдайларды талқылап, емдеу тактикасын анықтап, бір операциялық бөлмеде жұмыс істеп жатырмыз. Мұндай тәжірибе алмасу кәсіби байланысты нығайтып, бірлескен жұмыстың жаңа мүмкіндіктеріне жол ашады», – деді ҰҒОО клиникалық жұмыс жөніндегі басқарушы директоры Азат Чиналиев.
Қырғызстандағы Қазақстан медицинасы күндері мамандардың тікелей кәсіби диалог құруына, практикалық тәжірибе алмасуына және заманауи онкологиялық көмекті дамыту бағытындағы ынтымақтастықты нығайтуға мүмкіндік беретін маңызды алаңға айналды.
Қазақстандық травматологтар мен ортопедтер Қазақстан Республикасы Денсаулық сақтау министрлігінің академик Н.Ж. Батпенов атындағы Ұлттық травматология және ортопедия ғылыми орталығының мамандары Қырғыз Республикасындағы Қазақстан медицинасы күндері аясында Бішкек қаласында 10 бірлескен операция жасап, 50 пациентке консультациялық көмек көрсетті. Бірқатар заманауи хирургиялық араласулар алғаш рет Бішкек қаласының Жедел медициналық көмек клиникалық ауруханасының базасында орындалды.
Қазақстандық дәрігерлер клиника мамандарымен бірлесіп төрт операция жасады. Олардың қатарында жамбас-сан буынын эндопротездеу, омыртқаны транспедикулярлық фиксациялау, сан сүйегіне деротациялық остеотомия жасау және кеуде қуысының воронка тәрізді деформациясын хирургиялық жолмен түзету оталары бар.
Кейін тағы алты операция жасалды. Оның ішінде омыртқаның бел бөлігінің сынықтары мен дегенеративті өзгерістері кезінде жүргізілетін хирургиялық араласулар, тізе және жамбас-сан буындарын эндопротездеу, сондай-ақ тізе және тобық буындарына жасалған ортопедиялық операциялар бар.
Практикалық бағдарлама бөлімшелерді бірлесіп аралауды және клиникалық жағдайларды талқылауды қамтыды. Мамандар сынықтарды, омыртқа және тірек-қимыл аппараты ауруларын диагностикалау мен емдеудің заманауи тәсілдерін талқылады.
Ақтау қаласының жол-көлік оқиғасынан зардап шеккен Қазақстан Республикасының екі азаматына ерекше көңіл бөлінді. Олар жол-көлік оқиғасына Қырғызстан аумағында ұшыраған.
Академик Н.Ж. Батпенов атындағы Ұлттық травматология және ортопедия ғылыми орталығының басшылығымен оларды санитариялық авиация арқылы Астана қаласына жеткізу туралы келісім жасалды.
Қазақстанда азаматтарға онкологиялық ауруларды емдеу мемлекет қаражаты есебінен тегін медициналық көмектің кепілдік берілген көлемі шеңберінде жүргізіледі.
Пациенттерге заманауи ісікке қарсы 150 түрлі дәрілік препарат, ПЭТ/КТ диагностикасы, жоғары технологиялық операциялар және сәулелік терапияның заманауи әдістері қолжетімді. Жыл сайын 55 мыңнан астам адам дәрілік ісікке қарсы терапия алады.
Бүгінде елімізде 102 химиотерапиялық, 45 таргеттік және 3 иммуноонкологиялық препарат қолданылады. Медициналық көрсетілімдер болған жағдайда Қазақстан азаматтарына қажетті дәрілік терапия ТМККК шеңберінде ұсынылады.
Нақты препарат пен емдеу схемасын дәрігер диагнозды, аурудың сатысын, пациенттің жағдайын және ісіктің сипаттамаларын ескере отырып, әр пациентке жеке анықтайды.
Қазақстанда 19 ПЭТ/КТ аппаратымен жабдықталған 10 ядролық медицина орталығы жұмыс істейді. Сонымен қатар төрт циклотрондық-өндірістік кешен және бір фотондық эмиссиялық компьютерлік томография жүргізуге арналған жеті аппарат бар.
ПЭТ/КТ медициналық көрсетілімдер бойынша тағайындалады. Тексеруге жолдаманы медициналық-санитариялық алғашқы көмек көрсететін медициналық ұйым рәсімдейді, ал пациенттерді маршрутизациялау республикалық деңгейде үйлестіріледі.
Қазақстандық пациенттерге онкологиялық ауруларды емдеудің заманауи әдістері, оның ішінде таргеттік және иммуноонкологиялық терапия, жоғары дозалы химиотерапия және жасушалық иммунотерапия қолжетімді.
Онкологиялық орталықтарда ағзаны сақтауға бағытталған және реконструктивтік күрделі операциялар жасалады, аз инвазивтік және роботтық технологиялар қолданылады. Жекелеген бағыттарда үш өлшемді модельдеу және жеке дайындалатын сүйек имплантаттары, нейрохирургияда навигациялық жүйелер, лапароскопиялық және торакалдық хирургиялық араласулар пайдаланылады.
Елімізде сәулелік терапия жүргізуге арналған 40-тан астам аппарат, оның ішінде 26 желілік үдеткіш жұмыс істейді. Жыл сайын шамамен 15 мың пациент сәулелік терапия алады.
2025 жылы Қазақстанда Орталық Азиядағы алғашқы протондық терапия орталығы да ашылды. Онкологиялық практикаға сәулелік емдеудің заманауи технологиялары, оның ішінде адаптивтік, төрт өлшемді және стереотаксикалық терапия, сондай-ақ жоғары дозалы брахитерапия енгізілді.
Егер пациентте тексеру, тағайындалған препараттар, емдеу немесе емдеуге жатқызу бойынша сұрақтар туындаса, ең алдымен емдеуші дәрігерге немесе бөлім меңгерушісіне жүгіну қажет.
Сондай-ақ пациент пен оның жақындары өзі ем қабылдап жатқан Қазақстан Республикасы Денсаулық сақтау министрлігінің Қазақ онкология және радиология ғылыми-зерттеу институтының (ҚазОжРҒЗИ) немесе онкологиялық орталықтың пациенттерді қолдау қызметіне жүгіне алады. Мұнда медициналық көмекті ұйымдастыру және одан әрі емделу маршруты бойынша түсіндірме алуға болады.
Амбулаториялық жағдайда барлық консультациялар мен диагностикалық іс-шаралар жалпы кезектен тыс пациенттерге басымдықпен қызмет көрсетуді қамтамасыз ететін «жасыл дәліз» қағидаты бойынша жүзеге асырылады. Қызмет көрсету мерзімі – он сегіз жұмыс күніне дейін.
Мамандандырылған медициналық көмек деңгейінде онколог дәрігер диагнозды морфологиялық тұрғыдан верификациялауға және ісік процесінің таралу дәрежесін анықтауға бағытталған диагностикалық зерттеулердің толық кешенін жүргізеді.
Қазақстан азаматтарына онкологиялық көмек ТМККК шеңберінде тегін көрсетіледі.
eGov.kz порталында және eGov Mobile қосымшасында сенім білдірілген үшке дейінгі контактіні алдын ала көрсетуге болады. Олар пациент ауруханаға түсіп, жақындарымен өз бетінше байланыса алмаған жағдайда тиісті хабарлама алады.
Сервисті қосу үшін eGov порталынан «Емдеуге жатқызылған жағдайда хабардар ету үшін сенім білдірілген контактілерді тіркеу» қызметін таңдап, сенім білдірілген адамның ЖСН-ін көрсету қажет.
Сенім білдірілген контакт 18 жастан асқан және Мобильдік азаматтар базасында тіркелген болуы тиіс.
eGov Mobile қосымшасында сервис мына бөлімде қолжетімді: «Мемлекеттік қызметтер» → «Денсаулық сақтау».
Сервис тегін және шұғыл түрде емдеуге жатқызылған жағдайда кімге хабарлау қажеттігін алдын ала анықтауға мүмкіндік береді.
Қазақстандық мамандар Қазақстан медицинасы күндері шеңберінде Бішкек қаласындағы Ана мен бала денсаулығын сақтау ұлттық орталығының базасында екі күрделі жатырішілік емшара жүргізіп, қырғызстандық акушер-гинекологтармен практикалық тәжірибесімен бөлісті.
Астанадағы UMC Ана мен бала орталығының «Ұрық медицинасы» бағдарламасының жетекшісі, акушер-гинеколог Гүлмира Мағзұмованың жетекшілігімен қазақстандық мамандар әлі дүниеге келмеген екі балаға жатырішілік қан құю емшарасын жүргізді.
Бұл – ұрықтың ауыр анемиясы кезінде қолданылатын жоғары технологиялық медициналық емшара. Мұндай жағдай, атап айтқанда, ана мен ұрық арасындағы резус-қайшылық кезінде туындауы мүмкін. Бұл кезде ана ағзасында түзілген антиденелер баланың эритроциттеріне әсер етеді. Заманауи технологиялар жүктілік кезеңінде-ақ қажетті медициналық көмек көрсетуге мүмкіндік береді.
«Біз үшін Қазақстанда заманауи технологияларды қолдану ғана емес, жинақталған клиникалық тәжірибемізбен әріптестерімізбен бөлісу де маңызды. Мұндай бірлескен шеберлік сабақтары елдеріміз арасындағы кәсіби байланысты нығайтып, ана мен баланың денсаулығы үшін мамандардың практикалық білім алмасуына мүмкіндік береді», – деді Гүлмира Мағзұмова.
Қазақстан медицинасы күндері шеңберінде қазақстандық дәрігерлер консультациялар өткізіп, пациенттерді қабылдауда, қырғызстандық әріптестерімен тәжірибе алмасып, отандық медицинаның заманауи тәсілдерін таныстыруда.
Қазақстан Республикасы Денсаулық сақтау министрлігі мен Израильдің Berman Group компаниясының өкілдері медициналық кадрларды даярлау, мастер-кластар өткізу және заманауи медициналық технологияларды енгізу бағыттарындағы ынтымақтастық перспективаларын талқылады.
ҚР Денсаулық сақтау министрлігінде Денсаулық сақтау вице-министрі Манас Рамазановтың Berman Group директоры Марк Берманмен кездесуі өтті.
Тараптар қазақстандық медицина мамандарының алған білімдерін отандық клиникаларда кейіннен қолдана отырып, тәжірибеге бағдарланған оқытуды дамыту мүмкіндіктерін қарастырды.
Перспективалық бағыттардың бірі ретінде Қазақстанда медициналық ұйымдардың базасында израильдік мамандардың қатысуымен мастер-кластар өткізу ұсынылды. Мұндай формат дәрігерлерге заманауи тәсілдер мен технологияларды практикалық жұмыс барысында меңгеруге мүмкіндік береді.
«Біз үшін халықаралық ынтымақтастықтың нақты практикалық нәтижеге бағытталуы маңызды. Алынған білім мен технологиялар біздің медициналық ұйымдарда қолданылып, түптеп келгенде пациенттерге көрсетілетін медициналық көмектің сапасын арттыруға қызмет етуі тиіс», – деп атап өтті Манас Рамазанов.
Медициналық білім беру және ғылым саласындағы ынтымақтастық мүмкіндіктеріне, оның ішінде мамандар даярлау, кәсіби тәжірибе алмасу және бірлескен зерттеулер жүргізу мәселелеріне ерекше назар аударылды.
Денсаулық сақтау министрлігі «Гипофосфатемиялық рахит» диагнозы қойылған пациенттерді дәрілік затпен қамтамасыз ету мәселесіне қатысты төмендегіні хабарлайды.
2026 жылғы 15 қыркүйекте Қазақстан Республикасы Үкіметі Аппаратының Азаматтарды қабылдау орталығында Денсаулық сақтау вице-министрі Манас Рамазановтың қатысуымен еліміздің әр өңірінен келген гипофосфатемиялық рахиті бар балалардың 12 заңды өкілімен кездесу өтті.
Кездесу барысында Денсаулық сақтау вице-министрі орфандық аурулары бар пациенттерді дәрілік заттармен қамтамасыз ету мәселелері, оның ішінде қолданыстағы Орфандық аурулары бар пациенттерді дәрілік заттармен қамтамасыз ету қағидаларына сәйкес ағымдағы жылы қабылданған өзгерістер мен нормалар бойынша толық түсіндірме берді.
Сонымен қатар заңды өкілдерге ағымдағы жылы алғаш рет бекітілген, Қазақстан Республикасы Денсаулық сақтау министрінің №78 бұйрығымен бекітілген Орфандық аурулары бар пациенттерге медициналық көмек көрсетуді ұйымдастыру стандартының ережелері түсіндірілді.
Ата-аналарға 2026 жылғы 15 қыркүйекте өткен Орфандық аурулары бар пациенттерді қадағалап-қарау жөніндегі Сараптамалық кеңес отырысының нәтижелері туралы да жеке ақпарат берілді. Аталған отырыста буросумаб (Крисвита) дәрілік препаратын қолданудың орындылығы мен негізділігі мәселелері қаралды.
Бүгінгі таңда Қазақстан Республикасында осы сирек диагноз қойылған 23 бала тіркелген, оның 19-ы жергілікті бюджет қаражатының есебінен буросумаб (Крисвита) дәрілік препаратымен қамтамасыз етілген, ішінде үшеуі – жаңадан анықталған пациенттер.
Қарау қорытындысы бойынша 4 балаға қатысты Сараптамалық кеңес буросумаб (Крисвита) препаратын қолданудың орындылығы мен негізділігі жөнінде оң шешім қабылдады, оның ішінде: 1 бала – Атырау облысы; 2 бала – Маңғыстау облысы; 1 бала – Ақмола облысы.
Аталған балалардың заңды өкілдеріне Сараптамалық кеңес шешімдерін іске асыру бойынша бұдан арғы іс-қимыл тәртібі, оның ішінде медициналық бақылауды ұйымдастыру, қажетті медициналық құжаттарды ресімдеу және белгіленген тәртіппен дәрілік затпен қамтамасыз ету мәселелерін шешу жөнінде түсіндірме берілді.
Қаралған өзге де жағдайлар бойынша медициналық көрсетілімдер мен ұсынылған құжаттаманы ескере отырып, жеке түсіндірмелер беріліп, пациенттерді одан әрі қадағалап-қарау тактикасы және қажетті іс-қимылдардың реті айқындалды.
Осылайша, кездесу қорытындысы бойынша гипофосфатемиялық рахиті бар балалардың 12 заңды өкілінің барлығына дәрілік заттармен қамтамасыз ету, қолданыстағы нормативтік-құқықтық реттеу, медициналық құжаттаманы қарау нәтижелері және Сараптамалық кеңестің шешімдері бойынша толық әрі жеке түсіндірмелер берілді. Сондай-ақ әрбір балаға медициналық сүйемелдеудің одан арғы тактикасы айқындалды.
2025 жылға дейін сирек диагнозы бар пациенттерге, оның ішінде гипофосфатемиялық рахиті бар пациенттерге арналған бірқатар қымбат дәрілік препараттарды сатып алу «Қазақстан халқына» қорының қаражаты есебінен жүзеге асырылды.
Қазіргі уақытта «Гипофосфатемиялық рахит» орфандық ауруы бар пациенттерге арналған дәрілік препараттарды сатып алуды қаржыландыру жергілікті бюджеттер қаражаты есебінен жүзеге асырылады.