Медициналық қызметке берілген лицензия және (немесе) лицензияға қосымшаның қолданылуын тоқтату

Қазақстан Республикасының 2014 жылғы 16 мамырдағы № 202-V ҚРЗ «Рұқсаттар және хабарламалар туралы» Заңының 35-бабына сәйкес (бұдан әрі – Заң) лицензия және (немесе) лицензияға қосымшаның қолданылуы мынадай жағдайларда тоқтатылады:

1) берілген мерзімі өткенде;
2) жүзеге асырылуы үшін берілген әрекеттер (операциялар) толық көлемде жасалғанда;
3) лицензиядан және (немесе) лицензияға қосымшадан айырғанда (оларды қайтарып алғанда);
4) жеке тұлғаның қызметі тоқтатылғанда, заңды тұлға таратылғанда, қызметінің нысанасы қаржылық қызметтер көрсету болып табылатын шетелдік заңды тұлға филиалының қызметі тоқтатылғанда;
5) лицензиат лицензияның және (немесе) лицензияға қосымшаның қолданысын тоқтату туралы ерікті түрде лицензиарға өтініш жасағанда;
6) осы Заңға 1-қосымшадан лицензия немесе жекелеген қызмет түрі және (немесе) қызметтің кіші түрі немесе әрекет (операция) алып тасталғанда;
7) лицензиат лицензиялануға жататын тұлғалар қатарынан алып тасталғанда;
8) Қазақстан Республикасының заңдарында көзделген өзге де жағдайларда өзінің қолданысын тоқтатады.

Заңның 35-бабының 1-тармағының 6) және 7) тармақшаларында көзделген негіздер бойынша бойынша лицензияның және (немесе) лицензияға қосымшаның қолданысы тоқтатылған немесе лицензия электрондық нысанда ғана ресімделген жағдайларды қоспағанда, лицензияның және (немесе) лицензияға қосымшаның қолданысы тоқтатылған кезде лицензиат лицензияны және (немесе) лицензияға қосымшаны он жұмыс күні ішінде лицензиарға қайтаруға міндетті.

Заңның 35-бабының 1-тармағының 6) және 7) тармақшаларында көзделген жағдайларды қоспағанда лицензияның және (немесе) лицензияға қосымшаның қолданысы тоқтатылған кезден бастап, лицензиаттар жүзеге асыруға қолданысы тоқтатылған лицензия және (немесе) лицензияға қосымша берілген қызмет түрлерін (кіші түрлерін) немесе әрекеттерді (операцияларды) жүзеге асыруға құқылы емес.

Қазақстан Республикасының аумағында медициналық қызметті жүзеге асыруға берілген лицензия және (немесе) лицензияға қосымшаның қолданылуын тоқтату үшін жеке немесе заңды тұлғалар «электрондық үкімет» веб-порталы www.egov.kz, www.elicense.kz (бұдан әрі – портал) арқылы Қазақстан Республикасы Денсаулық сақтау министрлігінің Медициналық және фармацевтикалық бақылау комитетінің аумақтық департаменттеріне себебін және тоқтату негізін көрсете отырып өтініш жібереді.