Астанада медициналық және фармацевтикалық қызметтің өзекті мәселелері бойынша кеңейтілген кеңес өтті

Астанада Қазақстан Республикасы Денсаулық сақтау министрлігі Медициналық және фармацевтикалық бақылау комитетінің Департаменті кеңейтілген жұмыс кеңесін өткізді. Жиында фармацевтикалық және медициналық қызметті реттеудің негізгі бағыттары талқыланды. Шараға елорданың медициналық және фармацевтикалық ұйымдарының, салалық бірлестіктердің және кәсіби мамандардың жүзге жуық өкілі қатысты.

Кеңесті Департамент басшысы Құралбек С. А. ашты. Ол өз сөзінде кәсіби қоғамдастықпен ашық диалог орнатудың маңыздылығын атап өтті. Күн тәртібінде міндетті кәсіби жауапкершілікті сақтандырудан бастап дәрі-дәрмекке таңбалау енгізу, рецепт бойынша босату, шекті бағалар және мемлекеттік қызметтерді цифрландыруға дейінгі мәселелер қаралды.

Департамент басшысының орынбасары Ғаббасова Г. И. 2025 жылдың бірінші жартыжылдығындағы бақылау және лицензиялық жұмыстардың қорытындысын ұсынды. Елордада он алты мыңнан астам мемлекеттік қызмет көрсетіліп, мың жарымнан астам өтініш қаралған. Сотқа дейінгі іс-шаралардың аясында жүзден аса әкімшілік хаттама толтырылып, жиыны жиырма бес миллион теңгеден астам айыппұл салынды.

Кеңесте дәрілік заттарды таңбалау мәселесі де кеңінен сөз болды. Мәліметке сәйкес, Астанада таңбаланған 9,05 миллион орамның тек 61,4%-ы ғана айналымнан шығарылған. Бұл — ел бойынша орташа көрсеткіштен төмен. Осыған байланысты қатысушыларға есепке алу жүйесін оңтайландыру қажеттігі ескертілді.

Сондай-ақ кеңесте рецепт жазу ережелері, GPP талаптары, сертификаттар мен лицензияларды алу тәртібі және eLicense.kz порталы арқылы цифрлық рәсімдер кеңінен талқыланды. Спикерлер қатысушылардың көптеген сұрақтарына жауап берді, оның ішінде — мамандарды сертификаттау кезіндегі қиындықтар мен тексеру кезінде дәріханаларға арналған стандартты операциялық процедураларды әзірлеу қажеттілігі бар.

Кеңес қорытындысы бойынша бірқатар нақты шешімдер қабылданды. Атап айтқанда, дәрі-дәрмектерді босату кезінде нормативтік талаптарды қатаң сақтау, электрондық лицензияға көшуді жеделдету және 2026 жылдың 1 қаңтарына дейін жақсы дәріханалық практиканы (GPP) енгізу міндеті қойылды.

Ұйымдастырушылар қатысушылардың белсенділігін жоғары бағалап, мұндай кездесулер медициналық және фармацевтикалық көмек сапасын, құқықтық сауаттылықты және ашықтықты арттыруға сеп болатынын атап өтті.