Орал қаласында ұлттық киімнің қалай заманауи трендке айналып келе жатқаны көрсетілді

 

Ұлттық киім күніне орай Оралда тарихты, сәнді және заманауи шоудың элементтерін тоғыстырған ауқымды театрландырылған көрсетілім өтті. Сахнада көрермендер үшін ежелгі дала бейнелерінен бастап қазіргі дизайнерлік топтамаларға дейінгі шынайы визуалды саяхат ұсынылды.

Ұйымдастырушылар «тірі» форматқа басымдық берді: хореография, музыка және сахналық образдар арқылы көрермендерге қазақ ұлттық киімінің қалай қалыптасқаны және оның бүгінгі күндегі маңызы көрсетілді.

«Біз ұлттық киім тек өткеннің белгісі емес екенін көрсеткіміз келді. Бұл – күнделікті өмірде киюге болатын заманауи болмысымыздың бір бөлігі», – деді БҚО дизайнерлер қауымдастығының төрайымы Асем Сырымова.

Көрсетілімде ерекше назар заманауи топтамаларға аударылды. Батыс Қазақстан және Ақтөбе облыстарының дизайнерлері, соның ішінде Мария ханым сән үйі, AS_brands.kz орталығы, AQBOBEK.ASYLBEK бренді, Sagira сән үйі, сондай-ақ өңірдің жас дизайнерлері этностильдегі киімдерін ұсынды. Олар дәстүрлі ою-өрнектерді заманауи пішіндермен үйлестіре білді.

Шара қонақтары қолданбалы өнер шеберлерінің бұйымдары қойылған көрмені де тамашалады — кестеден бастап қолмен тігілген ұлттық киімдерге дейін ұсынылды.

«Әрбір ою-өрнектің өзіндік мәні бар. Бұл жай ғана әшекей емес, бұл – біз келесі ұрпаққа жеткізетін тарих», – деді қолданбалы өнер шебері М. Нұрғалиев.

Кештің қорытындысында барлық қатысушылар сахнаға бірге шығып, бұл көрініс бірлік пен ұрпақтар сабақтастығының символына айналды. Шара ортақ композициямен және елге арналған ақжарма тілек әнімен аяқталды.