Цифрлық өнер туындыларының таныстырылымы. Жаңару: өнер мен технологияның үндестігі

Бұл жоба қазақ халқының рухани дүниетанымындағы көне сенім жүйелерінің бірі – Тәңіршілдік ұғымының тарихи және мәдени маңызын зерттеуге арналған. Тәңіршілдік – түркі халықтарының дүниетанымында ерекше орын алатын, табиғатпен үйлесімді өмір сүруді, ата-баба рухына құрмет көрсетуді және адам мен ғарыштың біртұтастығын дәріптейтін көне рухани-танымдық жүйе.

          Жоба аясында бұл дүниетанымның қазақ халқының мәдениеті мен дәстүрлерінің қалыптасуына тигізген ықпалы қарастырылады. Сонымен қатар табиғатқа құрмет, көк аспанға табыну, әлемнің тұтастығы сияқты ұғымдардың ұлттық руханияттағы орны талданады.

          Жобаның негізгі бөліктерінің бірі – заманауи өнер бағытында ұсынылған Цифрлық өнер таныстырылымы. Бұл көркем жоба арқылы көне дүниетаным мен қазіргі технологиялардың үндестігі көркем бейнелер, символдар және цифрлық визуализациялар арқылы көрсетіледі.

          Таныстырылымда ежелгі түркілік мифология, табиғат символикасы, көк аспан бейнесі және адамның ғарышпен байланысы заманауи цифрлық графика құралдары арқылы интерпретацияланады. Жоба дәстүрлі рухани құндылықтарды жаңа көркем тіл арқылы таныстырып, ұлттық мәдениетті қазіргі заман өнері тұрғысынан жаңаша пайымдауға мүмкіндік береді.