Сібір жарасы ауруының алдын алу

Қоздырғышы Bacillus anthracis спора түзуші бактерия. Жануарлар мен адамның жіті аса қауіпті жұқпалы ауруы. Сібір жарасының үш түрі бар: терілік, өкпелік және ішекті. Терілік түрі жиі кездеседі, ал сирек өкпе мен ішекті жене асқынуы  — сепсис түрі. Бүгінгі таңда, Арыс қаласында сібір жарасының расталған жағдайы тіркелген жоқ. Дегенмен, үй қожалығы және үй жанауарлары бар әрбір тұрғын сібір жарасының қандай инфекция екенін білуі керек.

Сібір жарасын адамға жұқтырушы – үй жануарлары (ірі қара мал,  қой, ешкі, түйе, шошқа). Ал ауру адамнан адамға жұқпайды.

Инфекцияның берілу жолдары:

1. Қарым-қатынас арқылы- ауру жануарларға күтім жасау кезінде зақымдалған тері немесе шырышты қабықтар арқылы және

сібір жарасы бактериясымен ластанған  топырақпен егістікте жұмыс істеген кезде;

2. Алиментарлы - ауру малдардан алынған ет тағамдарын дайындау және оны тағамға тұтыну жолы арқылы.
3. Аэрогенді (ауа — шаң) – тыныс алу жолы арқылы.
4. Трансмиссивті-жәндіктердің шағуы (шыбын, масалар) арқылы.

Аурудың инкубациялық кезеңінің орташа ұзақтығы 2-3 күнді құрайды,бірнеше сағаттан 8-14 тәулікке дейін ауытқуы мүмкін.

Ауру тез басталады: алғашқы сағатта - дене температурасы 38-40 градусқа дейін күрт жоғарылайды және әлсіздік пайда болады.

Сібір жарасының белгілері:

- қатты бас ауруы;

- ісіну мен қышудың тез өсуімен, карбункул пайда болады (тері зақымданғанда);

- кеуде ауыруы (өкпе түрі жағдайында);

- тұншығу (өкпе түрінде);

- қан қоспасы бар диарея (ішек түрі жағдайында);

- іштің түйіліп аурулары (ішек жағдайында);

- қан қоспасы бар құсу (ішек түрі жағдайында).

Егер емдеу уақытында басталса, науқастар сауығады. Аурудың ауыр ағымы науқастың өліміне әкелуі мүмкін. Сондықтан, сібір жарасына жоғарыдағыдай күдікті белгілерін болса, дереу медициналық қызметке жүгіну қажет. Емдеу тек аурухана жағдайында жүргізіледі.

Сібір жарасы инфекциясынан қалай сақтануға болады:

1. Ет және ет өнімдерін тек сапасын бақылайтын жерлерде ғана сатып алу;
2. Ет, ет өнімдерін немесе кез келген мал шаруашылығы шикізатын өңдейтін және сататын адамдар өздерін және басқаларды қауіпсіздендіру үшін гигиеналық нормаларды ұстануға міндетті.
3. Жануарларды күту кезінде ветеринарлық-санитарлық ережелерді сақтау.
4. Үй малын сою тек қана арнайы орында (мал сою бекеті) ветеринарлық қызмет мамандарының рұқсатымен жүргізу.
5. Ауруға шалдыққан үй жануарларын веринарлық дәрігердің бақылауына жүгініп, алдын-ала сақтық шараларын орындау.
6. Ауру малды өз бетінше сойып, оны тағамға тұтынуға тиым салынады.
7. Үй жануарларын сібір жарасына қарсы егу жұмыстарын жүргізу.

 

Өзіңізді және жақындарыңызды ауыр кеселден сақтану үшін жоғарыда аталған сақтық шараларды қатаң сақтаңыз! «Денсаулық-зор байлық». Сондықтан сақ болайық!