СҚО санитариялық-эпидемиологиялық бақылау департаментінде Ұлттық қоғамдық денсаулық сақтау орталығы сарапшыларының жұмыс сапары аясында Департамент пен аумақтық басқармалардың мамандарына арналған семинар өтті.
Іс-шара Департамент басшысының орынбасары А.С. Күшбасовтың төрағалығымен ұйымдастырылды.
Семинар тақырыбы — «Атмосфералық ауа мен ауыз судың химиялық ластану факторларының халық денсаулығына әсерін бағалау мәселелері».
Баяндамамен «Ұлттық қоғамдық денсаулық сақтау орталығы» ШЖҚ РМК филиалының профилактикалық медицина, гигиена және экология зертханасының меңгерушісі А.Т. Досмұханов сөз сөйледі.
Семинар барысында қоршаған ортаның химиялық факторларының халық денсаулығына әсерін бағалау, атмосфералық ауа мен ауыз судың сапасы, сондай-ақ экологиялық тәуекелдерді бағалау мәселелері қаралды.
Санитариялық-эпидемиологиялық қызмет мамандарының жұмысында тәуекелді бағалау әдістерін практикалық қолдануға ерекше назар аударылды.
Жұмыс сапары аясында «Денсаулықты нығайтатын мектептер», «Салауатты университеттер» және «Салауатты жұмыс орындары» бағыттары бойынша профилактикалық бастамаларды іске асыру, сондай-ақ өңірдегі ұйымдармен және өнеркәсіптік кәсіпорындармен одан әрі өзара іс-қимыл мәселелері талқыланды.
ҰҚДО сарапшыларының жұмыс сапары тәжірибе алмасуға, мамандардың кәсіби құзыреттілігін арттыруға және халық денсаулығына әсер ететін қоршаған орта факторларын бағалау тәсілдерін жетілдіруге бағытталған.
