📌Косметикалық және косметологиялық қызметтер. Дұрыс жүргізілмеген косметикалық немесе косметологиялық қызметтердің салдары

Сұлулық индустриясында халыққа көрсетілетін көптеген қызметтердің ішінде косметикалық және косметологиялық қызметтер ерекше көзге түседі.

Косметикалық қызмет - бұл сәндік косметика құралдарын қолдана отырып, физикалық және химиялық әсер ету арқылы бет пен дене терісіне күтім жасау қызметі. Косметикалық қызметтер тұрмыстық санатқа жатады, нәтижесінде олар сыртқы келбетті тек эстетикалық жақсартады.

Косметологиялық қызмет - бұл адам ағзасының жабын тіндерінің (тері және оның қосымшалары, тері астындағы май және беткі бұлшықеттер) құрылымдық тұтастығы мен функционалдық белсенділігін сақтауға немесе қалпына келтіруге бағытталған емдеу-диагностикалық және оңалту шараларының кешені.

Косметикалық қызметтерге мыналар жатады: макияж; қас пен кірпікті бояу, қастардың пішінін түзету, кірпіктерді ұзарту, кірпіктерді бұйралау; косметикалық маскалар; эстетикалық массаж (СПА массажы).

Косметологиялық (медициналық) қызметтерге мыналар жатады: депиляция; бетті косметологиялық тазарту; медициналық массаж, крио массаж (дене тініне суық әсер ету); пирсинг, перманентті татуаж.

Косметологиялық қызметтерді ҚР Денсаулық сақтау органдары берген, тиісті сертификаты бар маман-косметолог - дәрігер жүргізуі тиіс. Барлық құжаттар қызмет көрсету кезінде жарамды болуы керек.

Жағымсыз салдардың негізгі себебі - зарарсыздандырылмаған құралдар болуы мүмкін, мұндай құралдар жараланған жерге инфекция жұқтырып, герпес, В және С гепатиттері, АИТВ сияқты ауыр жұқпалы ауруларды тудыруы мүмкін.

Өмір мен денсаулыққа төнуі мүмкін қауіптердің алдын алу мақсатында халықтың санитарлық-эпидемиологиялық саламаттылығы саласындағы санитарлық нормалар мен ережелердің талаптарын сақтау қажеттігі туралы ұмытпаған жөн.

Егер тұтынушыға сапасыз қызмет көрсетілсе, ол көрсетілген қызметтердің кемшіліктерін өтеусіз жоюды, бағаны төмендетуді немесе қызметтің кемшіліктерін жоюға жұмсалған шығындардың өтелуін талап етуге құқылы. Егер айтарлықтай кемшіліктер анықталса немесе анықталған кемшіліктер белгіленген мерзімде жойылмаса, онда тұтынушы шартты орындаудан бас тартуға және залалдарды толық өтеуді талап етуге құқылы («Тұтынушылардың құқықтарын қорғау туралы» Қазақстан Республикасының 2010 жылғы 04.05. №274-IV Заңының 16, 42-2-баптары).

ЕСІҢІЗДЕ БОЛСЫН! Косметикалық және косметологиялық қызмет көрсететін ұйымдар санитарлық ережелердің талаптарын қатаң сақтауы тиіс.

Сақтық шаралар Сіздің денсаулығыңыз бен сұлулығыңызды сақтайды!