Қауіпсіз мектеп формасын қалай таңдауға болады

Жаңа оқу жылының басталуымен әр ата-ананың баласына мектеп формасын таңдау мәселесі көтеріледі. Жасөспірімдердің ағзасы үшін мектеп киімінің ыңғайлы және қауіпсіз болуы маңызды.

Мектеп формасы мен аяқ киімді балалардың жас ерекшеліктерін, аса ашық емес түстерді ескере отырып таңдау керек. Мектеп формасын таңдағанда, матаның таңбалануына, құрамына назар аудару керек. Маталар бактерияға, микробқа қарсы және антистатикалық қасиеттері бар тозуға төзімділігі жоғары жартылай жүн және мақта болуы керек, заттар қатты мыжылып қалмас үшін 75-85% табиғи маталар (мақта, жүн және басқалары) және 15-25% синтетикалық қоспалар ұсынылады. Дұрыс өлшемді таңдаңыз, балаңыздың жүргенде, отыру кезінде де ыңғайлы екеніне көз жеткізіңіз. Киім қозғалысты шектемеуі, тым тар болмауы керек, өйткені тығыз юбка немесе шалбар іштің ауырсынуына әкеледі, ал тығыз жейделер мен сарафандар тыныс алуды бұзуы мүмкін. Бұл денені дұрыс сақтау үшін де маңызды. Қозғалысты шектейтін киім мектеп оқушысы белсенді қозғалғанда үзілісте жарақатқа әкелуі мүмкін. Дұрыс кесіп-тігілген киім жарақат алу қаупін азайтады.

Аяқ киім тығыз немесе тым бос болмауы керек. Аяқ киім тоқыма, киіз, шынайы былғары сияқты табиғи материалдардан жасалуы керек. Бұл материалдардың қасиеті - олар аяқтың анатомиялық пішініне бейімделеді. Аяқ киімнің таңбалануын зерттеңіз, онда өндіруші, өлшемі, модель, үстіңгі материал, астары, аяқ киімге күтім жасау шарттары туралы ақпарат болуы керек.

Өнімнің сапасы мен қауіпсіздігін растайтын құжаттарды міндетті түрде талап етіңіз. Мектеп формасы мен аяқ киімнің қауіпсіздігінің кепілі "Балалар мен жасөспірімдерге арналған өнімнің қауіпсіздігі туралы" Кеден одағының 007/2011 техникалық регламентінің талаптарына сәйкестік сертификаты болып табылады.