Халыққа қызмет – абыройлы міндет
Санитариялық-эпидемиологиялық қызмет – халықтың денсаулығы мен елдің санитариялық-эпидемиологиялық саламаттылығын қамтамасыз етуде айрықша маңызға ие сала. Бұл жауапты саланың дамуына саналы ғұмырын арнап, кәсіби міндетін адал атқарған мамандардың еңбегі ерекше құрметке лайық. Солардың бірі – Нұрпеисова Қарлығаш Ермағамбетқызы.
Қарлығаш Ермағамбетқызы 1957 жылғы 2 шілдеде Қарағанды облысында дүниеге келген. 1977 жылы Қарағанды медициналық училищесін «санитариялық фельдшер» мамандығы бойынша тәмамдаған. Оқу орнын аяқтағаннан кейін бар еңбек жолын санитариялық-эпидемиологиялық қызметке арнап, осы салада 38 жылдан астам уақыт абыройлы қызмет атқарды.
1977–2015 жылдар аралығында санитариялық-эпидемиологиялық қызмет жүйесінде эпидемиолог болып еңбек етіп, халықтың санитариялық-эпидемиологиялық саламаттылығын қамтамасыз ету ісіне елеулі үлес қосты.
Кәсіби қызметінде Қарлығаш Ермағамбетқызы жоғары жауапкершілігімен, тиянақтылығымен және өз ісіне деген адалдығымен танылды. Көп жылғы еңбек барысында жинақтаған мол тәжірибесін жас мамандарға үйретіп, әріптестеріне әрдайым қолдау көрсетті. Өз ісінің білікті маманы ретінде ұжым арасында зор құрмет пен беделге ие болды.
Зейнеткерлікке шыққаннан кейін де санитариялық-эпидемиологиялық қызмет саласындағы еңбек жолын жалғастырып, жас мамандармен тәжірибесін бөлісті. Оның кәсіби жолы – мамандыққа адалдықтың, жауапкершіліктің және халық игілігі жолындағы табанды еңбектің жарқын үлгісі.
Қарлығаш Ермағамбетқызының еңбегі жоғары бағаланып, Қазақстан Республикасы Денсаулық сақтау министрінің, облыс және аудан әкімдерінің Құрмет грамоталарымен марапатталды.
Қарлығаш Ермағамбетқызын Санитариялық-эпидемиологиялық қызмет жұмыскері күнімен шын жүректен құттықтаймыз! Халықтың санитариялық-эпидемиологиялық саламаттылығын қамтамасыз ету жолындағы ұзақ жылғы адал еңбегіңізге, салаға қосқан елеулі үлесіңізге және кейінгі буын мамандарына берген мол тәжірибеңізге алғысымызды білдіреміз.
Сізге зор денсаулық, ұзақ ғұмыр, отбасылық амандық, бақ-береке және әрдайым құрмет пен абырой тілейміз!