Тауардың заңды түрде сатылатындығының 5 белгісі

Бүгінде тұтынушылар дүкендер мен интернет-платформаларда ұсынылатын тауарлардың үлкен таңдауына ие. Алайда ассортименттің артуымен бірге сапасыз немесе шығу тегі күмәнді өнімдерді сатып алу қаупі де өсуде. Сондықтан әрбір сатып алушы тауардың заңды түрде сатылып жатқанын көрсететін негізгі белгілерді білуі маңызды.

 

Ең алдымен Еуразиялық сәйкестік (бұдан әрі – ЕАС) белгісіне назар аудару қажет. Бұл таңба өнімнің Еуразиялық экономикалық одақтың техникалық регламенттері талаптарына сәйкес келетінін және қажетті бағалау рәсімдерінен өткенін білдіреді. Әдетте ЕАС белгісі қаптамада, заттаңбада немесе өнімнің өзінде орналастырылады.

 

Келесі маңызды белгі – өндіруші туралы ақпараттың болуы. Тауарда немесе оның қаптамасында өндірушінің атауы, өнім шығарылған ел және байланыс деректері көрсетілуі тиіс. Мұндай мәліметтердің болмауы өнімнің заң талаптарын бұза отырып сатылып жатқанын көрсетуі мүмкін.

 

Сонымен қатар тұтынушыға арналған нұсқаулық пен ақпараттың қазақ немесе орыс тілінде берілуі маңызды. Сатып алушы өнімді пайдалану тәртібімен, сақтау шарттарымен және қауіпсіздік талаптарымен таныса алуы керек. Бұл әсіресе тұрмыстық техника, электроника және балаларға арналған тауарлар үшін өте маңызды.

 

Импорттаушы немесе жеткізуші туралы мәліметтердің болуы да заңды сауданың маңызды көрсеткіші болып табылады. Бұл ақпарат өнімге қатысты сұрақтар туындаған жағдайда жауапты тұлғаларды анықтауға мүмкіндік береді және тұтынушылардың құқықтарын қорғауға көмектеседі.

 

Сондай-ақ сенімді сатушы әрқашан өнімнің белгіленген талаптарға сәйкестігін растайтын құжаттарды көрсетуге дайын болады. Қажет болған жағдайда сатып алушы сәйкестік сертификатын немесе сәйкестік туралы декларацияны сұратып, олардың шынайылығын ресми реестрлер арқылы тексере алады.

 

Тауарды таңдауға жауапкершілікпен қарау тұтынушыны сапасыз және қауіпті өнімдерден қорғап қана қоймай, нарықтағы адал бәсекелестіктің дамуына да ықпал етеді. Бірнеше қарапайым белгіні тексеру көп уақыт алмайды, бірақ қауіпсіз әрі сенімді сатып алу жасауға мүмкіндік береді.