Мектепке дейінгі ұйымдарда өндірістік бақылауды жүргізу туралы

Мектепке дейінгі ұйымдарда (балабақшаларда) балалардың өмірі мен денсаулығын сақтау – негізгі басымдықтардың бірі. Осы мақсатта санитариялық-гигиеналық талаптардың, қауіпсіздік ережелерінің және еңбек қорғау нормаларының сақталуын қамтамасыз ететін өндірістік бақылау жүйесі жүргізіледі.

 

Өндірістік бақылау - ұйым қызметінің барлық бағыттарында заңнамалық талаптардың орындалуын қадағалайтын маңызды басқару тетігі болып табылады.

 

Мектепке дейінгі ұйымдардағы өндірістік бақылау Қазақстан Республикасы Денсаулық сақтау министрінің 2021 жылғы 9 шілдедегі № ҚР ДСМ-59 бұйрығымен бекітілген  «Мектепке дейінгі ұйымдарға және сәбилер үйлеріне қойылатын санитариялық-эпидемиологиялық талаптар» санитариялық қағидасының 8-тарауына сәйкес жүргізіледі.  

 

Мектепке дейінгі ұйымдардағы өндірістік бақылаудың негізгі мақсаты - тәрбиеленушілер мен қызметкерлер үшін қауіпсіз әрі қолайлы жағдай жасау.

 

Негізгі міндеттері:

- санитариялық-эпидемиологиялық талаптардың сақталуын бақылау;

- тағам өнімдерінің сапасы мен қауіпсіздігін тексеру;

- ғимараттардың, ойын алаңдарының және жабдықтардың жарамдылығын қадағалау;

- еңбек қауіпсіздігі мен еңбекті қорғау талаптарының орындалуын қамтамасыз ету;

- жұқпалы аурулардың алдын алу.

 

Өндірістік бақылаудың негізгі бағыттары:

 

1. Санитариялық-гигиеналық бақылау

Топ бөлмелерінің тазалығы, желдетілуі, жарықтандырылуы, температуралық режимі тұрақты түрде бақыланады. Күнделікті ылғалды тазалау, дезинфекциялық жұмыстардың уақтылы жүргізілуі маңызды.

 

2. Тамақтандыруды бақылау

Балаларға арналған тағамның сапасы, мәзірдің жас ерекшелігіне сәйкестігі, азық-түліктің сақтау мерзімі мен шарттары тексеріледі. Ас блогында санитариялық талаптардың сақталуы – өндірістік бақылаудың басты элементі.

 

3. Медициналық бақылау

Балалардың денсаулық жағдайын бақылау, профилактикалық тексерулер, вакцинацияның жүргізілуі және қызметкерлердің медициналық тексеруден уақытылы өтуі қадағаланады.

 

4. Еңбек қауіпсіздігі және техника қауіпсіздігі

Қызметкерлерге нұсқама жүргізу, қауіпті жағдайлардың алдын алу, төтенше жағдайлар кезіндегі әрекет алгоритмдерін сақтау өндірістік бақылау аясында жүзеге асырылады.

 

5. Құжаттаманы жүргізу

Өндірістік бақылау бағдарламасы, журналдар, актілер, тексеру нәтижелері арнайы құжаттарда тіркеліп отырады.

 

Өндірістік бақылауды ұйымдастыру үшін балабақшада жауапты тұлға (әдетте, меңгеруші немесе оның орынбасары) тағайындалады. Бақылау жоспарлы және жоспардан тыс түрде жүргізіледі. Әрбір анықталған кемшілік бойынша түзету шаралары қабылданады.

 

Қорытындылай келе, мектепке дейінгі ұйымдарда өндірістік бақылауды жүйелі және сапалы жүргізу балалардың денсаулығын сақтауға, ата-аналардың сенімін арттыруға және ұйым қызметінің тиімділігін қамтамасыз етуге мүмкіндік береді. Сондықтан өндірістік бақылау балабақша жұмысының ажырамас бөлігі болып табылады.