Тәуліктік сынамаларды іріктеудің тәртібіне қойылатын санитариялық -эпидемиологиялық талаптар

2025 жылдың 1 қыркүйегінен бастап «Денсаулық сақтау және білім беру ұйымдарында тамақтану стандарттарын бекіту туралы» (бұдан әрі - Стандарт) Қазақстан Республикасы Денсаулық сақтау министрінің 2020 жылғы 21 желтоқсандағы № ҚР ДСМ-302/2020 бұйрығына өзгерістер енгізу туралы» Қазақстан Республикасы Денсаулық сақтау министрінің 2025 жылғы 4 наурыздағы № 16 бұйрығы күшіне енді, бұл бұйрықта білім беру ұйымдарында тамақтану барысында тәуліктік сынамаларды алу тәртібі айқындалған.

Стандарт талаптарына сәйкес білім беру обьектілеріндегі ас блогында әр дайындалған тағам партиясынан тәуліктік сынама күн сайын қалдырылады. Тәуліктік сынаманы алуға тағайындалған жауапты тұлға (ас блогының қызметкері) арнайы залалсыздандырған құрал саймандарды пайдалана отырып, тағаммен жанасуға рұқсат етілген, залалсыздандырылған және таңбаланған, тығыз жабылатын жеке ыдыстарға алады. Әр тағам мен аспаздық өнім үшін бөлек ыдыс пайдаланылады.

Салқын тағамдар, бірінші және үшінші тағамдар (сусындар), гарнирлер – кемінде 200 г. көлемінде алынады. Дайын тағам порцияларының саны органолептикалық бағалау мен тәуліктік сынамаға арналған үлестерді ескере отырып есептеледі.

Сынамалар тағам оқушыларға берілмей тұрып, тікелей қазаннан алынады. Тәуліктік сынамалар ас блогындағы дайын тағамды сақтауға арналған арнайы тоңазытқыштағы арнайы белгіленген орында +4-тен + 6 °С дейінгі темпертаурада кемінде 48 сағат сақталады. Сынамаларды алу күні мен уақыты көрсетілуі тиіс, сондай-ақ демалыс күндерінен кейін дайындалған жаңа тағаммен таңғы ас, түскі ас, бесін ас немесе кешкі ас ауыстырылғанға дейін сақталады (демалыс күндерінің санына қарамастан).

Сақтау мерзімі өткеннен кейін тәуліктік сынамалар тағам қалдықтары ретінде кәдеге жаратылады.

Осы талаптарды сақтау білім беру объектілерінде тамақтанатын балалар арасында тағамнан улану жағдайы тіркелген жағдайда тергеп-тексеру жүргізу барысында тағамның сапалы немесе сапасыз дайындалғанын дәлелдейтін негізгі факторлардың бірі болып табылады.