Тағамдық қоспалар мен ББҚ-ның айырмашылығы неде және оның денсаулық үшін маңызы қандай

Ақмола облысының санитариялық-эпидемиологиялық бақылау департаменті күнделікті өмірде «тағамдық қоспалар» мен «биологиялық белсенді қоспалар» (ББҚ) ұғымдарының жиі шатастырылатынын хабарлайды. Алайда бұл өнім түрлері мақсаты, құрамы, қолданылу тәсілі және құқықтық реттелуі тұрғысынан бір-бірінен түбегейлі ерекшеленеді.

 

Тағамдық қоспалар – тағам өнімдерінің қасиеттерін жақсарту мақсатында оларды өндіру, өңдеу немесе сақтау барысында қосылатын заттар. Олар дәмі мен хош иісін сақтау, түсі мен құрылымын тұрақтандыру, сақтау мерзімін ұзарту және өндірістік үдерістерді оңтайландыру үшін пайдаланылады. Сонымен қатар, тағамдық қоспалар аурулардың алдын алу немесе емдеу үшін қолданылмайды және адам ағзасына тікелей емдік әсер етуге арналмаған.

 

Биологиялық белсенді қоспалар тағамға арналған арнайы өнімдер қатарына жатады және ағзаны қажетті нутриенттермен толықтыру үшін пайдаланылады. ББҚ әдетте капсула, таблетка, ұнтақ немесе сұйық түрінде шығарылады және мөлшерленген түрде қабылданады. Олар дәрілік зат болып табылмайды, дегенмен олардың қауіпсіздігі міндетті түрде расталуы тиіс.

 

Кеден одағының техникалық регламенттері талаптарына сәйкес, соның ішінде ТР ТС 021/2011 нормаларына сай, барлық ББҚ мемлекеттік тіркеуден өтуге міндетті. Олардың қауіпсіздігін растайтын негізгі құжат – уәкілетті орган беретін мемлекеттік тіркеу туралы куәлік. Мұндай құжатсыз өнімді әкелуге және сатуға жол берілмейді.

 

Департамент тағамдық қоспалар мен ББҚ өзара алмастырылатын өнімдер емес екеніне назар аударады. Олардың айырмашылығын дұрыс түсіну тұтынушыларға өнім таңдауда саналы шешім қабылдауға мүмкіндік береді және денсаулықты сақтауға ықпал етеді.

 

Заңнама талаптарын сақтау және өнімнің құрамы мен шығу тегіне мұқият қарау – халықтың санитариялық-эпидемиологиялық саулығын қамтамасыз етудің маңызды шарттарының бірі.