Ақмола облысында жоғары GPA көрсеткіші бар түлектер мемлекеттік қызметке конкурссыз орналасу мүмкіндігіне ие

Ақмола облысында дарынды әрі білімді жастарды мемлекеттік қызметке тарту тетігі жүйелі түрде жүзеге асырылуда. Оқу үлгерімі жоғары түлектер конкурс рәсімінсіз мемлекеттік қызметке орналасу мүмкіндігіне ие.

Қазақстан Республикасының «Мемлекеттік қызмет туралы» Заңына сәйкес, орташа үлгерім көрсеткіші (GPA) 3,33-тен төмен емес және диплом алғанына бір жылдан аспаған түлектер «Б» корпусының жекелеген әкімшілік мемлекеттік лауазымдарына конкурстан тыс тәртіппен тағайындала алады.

Бұл норма сапалы білім мен мемлекеттік қызметтегі кәсіби жолдың басталуын өзара сабақтастырады. Нәтижесінде мемлекеттік органдарға бастамашыл, жауапкершілігі жоғары әрі білікті жас мамандар тартылып, басқару жүйесінің тиімділігі артады.

Аталған мүмкіндік орталық мемлекеттік органдардың аумақтық бөлімшелеріне де қатысты. Соның ішінде түлектер Ақмола облысының санитариялық-эпидемиологиялық бақылау департаментіне жұмысқа орналаса алады.

Департамент халықтың санитариялық-эпидемиологиялық саламаттылығын қамтамасыз ету, жұқпалы және жұқпалы емес аурулардың алдын алу, санитариялық талаптардың сақталуын қадағалау бағытында қызмет атқарады. Бұл жас мамандар үшін алған білімін іс жүзінде қолдануға, қоғамдық денсаулықты қорғау ісіне үлес қосуға және кәсіби тәжірибе жинақтауға үлкен мүмкіндік.

Мұндай кадрлық саясат өңірдің зияткерлік әлеуетін нығайтып, мемлекеттік қызметтің сапасын арттыруға ықпал етеді.

Осылайша, Ақмола облысының мемлекеттік қызмет жүйесі талантты жастарға ашық әрі олардың кәсіби дамуына нақты жағдай жасайды.