Листериоз: алдын алу шаралары және Ақмола облысындағы эпидемиологиялық жағдай

Осы жылдың 10 айының қорытындысы бойынша Ақмола облысында халық арасында листериоз тіркелген жоқ, эпидемиологиялық жағдай тұрақты. Десе де, жұқпаның алдын алу және халықтың хабардарлығын арттыру мақсатында листериоз туралы және оның негізгі сақтану жолдары жөнінде ақпарат ұсынылады.

Листериоз — Listeria monocytogenes бактериясы қоздыратын жұқпалы ауру. Зарарланудың ең жиі таралған жолы — өндіріс, сақтау немесе тасымалдау кезеңдерінде ластанған тағам өнімдерін тұтыну. Инфекцияның таралуына ықтимал факторлар қатарына жуылмаған көкөністер мен жемістер, ет өнімдері, пастерленбеген сүт пен жұмсақ ірімшіктер, сондай-ақ ластанған су жатады.

Ауру әсіресе жүкті әйелдерге, жаңа туған нәрестелерге, қарт адамдарға және иммундық жүйесі әлсіреген тұлғаларға айрықша қауіп төндіреді. Клиникалық белгілері дене қызуының жоғарылауы, жүрек айну, құсу, іш өту, бұлшықет ауыруы және қатты әлсіздік түрінде байқалуы мүмкін.

Листериоздың алдын алу үшін ұсынылады:

– жеке бас және ас үй гигиенасын сақтау;

– көкөністер мен жемістерді тұтынар алдында мұқият жуу;

– тағам өнімдерін жеткілікті деңгейде термиялық өңдеу;

– қауіп тобына жататын адамдардың тағамды таңдауда және пайдаланғанда қосымша сақтық шараларын қадағалауы.

Осы профилактикалық талаптарды орындау листериоз жұқтыру қаупін айтарлықтай төмендетіп, халықтың денсаулығын қорғауға мүмкіндік береді.