Ақмола облысының бас мемлекеттік санитариялық дәрігері Серік Омарханов брифинг барысында 2025 жылдың алғашқы алты айындағы өңірдегі эпидемиологиялық жағдайдың қорытындысын жариялады. Оның айтуынша, жалпы жұқпалы және паразиттік аурулар бойынша жағдай тұрақты, дегенмен кейбір көрсеткіштерге ерекше назар аудару қажет.

Ақмола облысының бас мемлекеттік санитариялық дәрігері Серік Омарханов брифинг барысында 2025 жылдың алғашқы алты айындағы өңірдегі эпидемиологиялық жағдайдың қорытындысын жариялады. Оның айтуынша, жалпы жұқпалы және паразиттік аурулар бойынша жағдай тұрақты, дегенмен кейбір көрсеткіштерге ерекше назар аудару қажет.
Бірқатар жұқпалы аурулар бойынша сырқаттанушылықтың төмендеуі оң динамиканы көрсетіп отыр. Мәселен, дизентерия жағдайлары 2 есе, көкжөтел - 3,1 есе, қызылша - 3,8 есе, менингококк инфекциясы - 4 есе азайған.
Сонымен қатар, сальмонеллезбен сырқаттанушылық 1,2 есе, кене энцефалиті – 2 есе, созылмалы вирусты гепатиттер - 1,1 есе, оның ішінде В гепатиті - 1,7 есе, Лайм ауруы - 2 есе, серозды менингиттер - 2,5 есе және басқа да бірқатар инфекциялар бойынша өсім байқалады.
Сондай-ақ, спикердің айтуынша, биылғы жылдың басынан бастап облыста 14 жасқа дейінгі балалар арасында 225 ауру жағдайы тіркелген. Оның ішінде 92% жағдайда балалар егілмеген болып шықты. Вакцинацияның болмау себептері ретінде жасына жетпегені, ата-аналардың бас тартуы, медициналық қарсы көрсетілімдер және екпеге келмеу аталды.
Серік Омарханов жағдайды тұрақтандыру мақсатында белсенді вакцинация науқаны жүргізіліп жатқанын атап өтті. Жылдың бірінші жартысында бір жасар балалардың 50,9%-ы (шамамен 5 мың бала), ал алты жастағылардың 46,6%-ы (5,6 мыңнан астам бала) егілді. Сондай-ақ, жоспарлы екпелерден тыс қалған 18 жасқа дейінгі балаларға қосымша иммундау жүргізілуде - 1,7 мыңнан астам адам егілді. 2023 жылдың қарашасынан бастап қосымша жаппай иммундау жүргізіліп, 15,4 мыңға жуық адам, оның ішінде бір жасқа дейінгі балалар мен медицина қызметкерлері егілді.
Көкжөтелге келер болсақ, биыл 5 жасқа дейінгі балалар арасында 7 жағдай тіркелген, олардың барлығы егілмеген. Салыстырмалы түрде, 2024 жылы көкжөтелдің 22 жағдайы тіркелген болатын, негізінен балалар арасында.
Жартыжылдық қорытындысы бойынша халықты профилактикалық екпемен қамту деңгейі 46,2% құрады.
Туберкулезбен күресте де оң үрдіс байқалады - сырқаттанушылық 9,4% төмендеп, 100 мың халыққа шаққанда 16,3 жағдайды құрады. Перзентханаларда жаңа туған нәрестелердің 96%-дан астамы БЦЖ екпесімен қамтылған. Қауіп тобына кіретін адамдар арасында флюорографиялық тексерулермен қамту деңгейі 93,2%-ға дейін өсті, нәтижесінде 42 науқас анықталды, олардың 85%-ы қауіп тобынан.
Серік Омарханов халық денсаулығын сақтау және инфекциялық аурулардың өршуінің алдын алу үшін вакцинация мен санитариялық талаптарды сақтау маңызды екенін ерекше атап өтті.