Кенелерден абай болыңыз!
Жаз мезгілінде адамдардың көбі табиғат аясында – орманда, саяжайда, саябақтарда немесе жай ғана ағаштардың көлеңкесінде уақыт өткізуді жөн көреді. Алайда жылы мезгіл дәстүрлі түрде ауыр инфекцияларды – кене энцефалиті мен Лайм ауруын тасымалдауға қабілетті кенелердің белсенділігімен қатар жүреді. Кененің шағуы көбіне байқалмай қалады, бірақ дер кезінде медициналық көмек көрсетілмесе, ауыр зардаптарға әкелуі мүмкін.
Эпидемиологиялық маусым басталғалы Ақмола облысында кене шағуына байланысты 678 жағдай тіркелді. Бұл өткен жылдың сәйкес кезеңімен салыстырғанда 2,1 есе көп – былтыр 310 жағдай болған. Бұл көрсеткіш биыл кенелердің белсенділігінің артқанын білдіреді және тұрғындардан ерекше сақтықты талап етеді.
Бір апта ішінде кене шағуына байланысты 19 жағдай тіркелді, оның 10-ы 14 жасқа дейінгі балалар арасында. Барлық зардап шеккендер дер кезінде дәрігерге жүгінді. Кене энцефалитінің алдын алу үшін 14 адамға иммуноглобулин тағайындалды. Қалған бес адамға ем жүргізілген жоқ, өйткені олардың шағуы эндемиялық емес аймақтарда болған, ол жерлерде вирус жұқтыру қаупі төмен.
Кенелер көбіне биік шөптерде, орман шетінде, бұталарда және саяжай аумақтарында кездеседі. Ең жоғары шағу қаупі – жылы әрі құрғақ ауа райында, әсіресе таңертең және кешке байқалады. Шағу зиянсыз болып көрінгенімен, егер зардап шеккен адам бала немесе егде жастағы адам болса, бұл ұзақ әрі күрделі емдеуді талап ететін жағдайға әкелуі мүмкін.
Ақмола облысының санитариялық-эпидемиологиялық бақылау департаменті кене шағу жағдайында мүмкіндігінше тезірек дәрігерге қаралу қажеттігін еске салады. Мамандар кене теріде болса, оны алып тастап, жұқтыру қаупін бағалап, қажет болған жағдайда алдын алу емін тағайындайды. Өзін-өзі емдеу немесе шағуды елемеу инфекцияның кеш анықталуына және ауыр асқынуларға әкелуі мүмкін.
Кенелердің белсенділік маусымы жалғасуда. Табиғат аясында серуендегенде мұқият болыңыз, сақтық шараларын сақтаңыз және өзіңіздің қауіпсіздігіңізді ұмытпаңыз. Дер кезінде дәрігерге жүгіну – денсаулықты сақтаудың басты кепілі.