Қазақстан мен Жапония музыканттары Токио Олимпиадасына қатысушыларға композиция арнады

Жамбыл атындағы Қазақ Мемлекеттік филармониясының артистері Токиода өтіп жатқан Олимпиада-2020 қарсаңында достық, келісім және өзара қолдауға арналған бейнеролик жариялады.

         Бейнероликке Жамбыл атындағы Қазақ Мемлекеттік филармониясының жеке орындаушылары Ержан Әлімбетов (домбыра), Федор Артамонов (виолончель); Б.Байқадамов атындағы Мемлекеттік хор капелласының артисі Индира Құдабаева (вокал); «STEPPE SONS» альтернатив-фольк тобының белді мүшесі Мұратбек Раманқұлов секілді қазақ музыканттарымен қатар, жапондық музыканттар Юмико Фурухаши (моринхуур), Такеши Такеучи (электрический бас), Тузан Хирано (сякухачи), Аи Ямагучи (вокал) да атсалысты.

         Екі елдің артистері бірігіп Рокусукэ Эйдің сөзіне, композитор Хатидай Накамураның музыкасына жазылған жапондық әнші Кю Сакамотоның әйгілі «Ue o Muite Arukō» («Sukiyaki») әнін орындап шықты. Бұл ән Жапонияда 1961 жылы дүниеге келген, бірнеше мемлекеттердің топ-чарттарында, соның ішінде американдық «Billboard hot 100» чартында, бірінші орындарды иемденген. Сонымен қатар, музыканттар қазақтың «Көзіңнің мөлдірін-ай» атты халық әнін нақышына келтіріп орындады.

-Менің ойымша, қазақ музыканттарымен бірігіп жасаған композициямыз өте жылы әрі шынайы шыққан секілді. Бұл шығармашылық коллаборация керемет болды, мен жұмыс қорытындысына таң қалып отырмын. Жобаға қатысқан барша музыканттарға және жобаға қатысуға шақырған Серік Нұрмолдаевқа алғысымыз шексіз! – деп жазады өзінің жеке парақшасында жобаға қатысушылардың бірі Юмико Фурухаши.

Жоба музыканттардың композицияға қазақ және жапон халықтарының көне музыкалық аспаптарын пайдалануымен және әндердің түпнұсқадағы тілде орындалуымен ерекшеленген. Бейнероликте қос мемлекеттің айрықша табиғаты мен көне салт-дәстүрлері көрсетілген.

Бейнероликтің басты идеясы халықтар арасындағы өзара байланысты нығайту.