Қазақстанның құнды жәдігерлері «Бір белдеу, бір жол» бұлтты музейінде таныстырылады

Бейжіңде өткен IV Дүниежүзілік музей директорлары форумы аясында «Бір белдеу, бір жол» бұлтты музейі жобасының алдын ала таныстырылымы өтті. Жобаның бастамашысы – Қытайдың Ұлттық музейі.

Халықаралық цифрлық платформаның таныстырылымына Қазақстан, Қытай, Португалия және басқа да елдердің музей басшылары қатысты.

«Бір белдеу, бір жол» бұлтты музейі жобасы әр елдің музей қорларын ортақ платформаға жинақтап, көпшілікке тарихи және мәдени мұрамен кеңінен танысуға мүмкіндік береді.

Жоба аясында әлем халықтарының бірегей жәдігерлері, тарихи деректері мен мәдени мұрасы цифрлық форматта ұсынылады.

Жобаны жүзеге асыру жұмыстары 2026-2030 жылдар аралығында кезең-кезеңімен жүргізіледі.

Платформаның ресми іске қосылуы 2026 жылдың соңына жоспарланған.
Бұл бастама Қазақстан мен Қытай арасындағы мәдени байланыстарды жаңа деңгейге көтеріп, музей ісіндегі халықаралық ынтымақтастықты кеңейтуге жол ашады.

Айта кетейік, бүгінде Қазақстанда еліміздің әр өңіріндегі ондаған мың жәдігерді біріктіретін бірыңғай E-museum ұлттық порталы жұмыс істейді.

 

ҚР Мәдениет және ақпарат министрлігінің баспасөз қызметі