Өңірлік тамыз конференциясы: «Білім берудің болашағы: адал азамат, кәсіби маман»

27 тамыз күні «Атамекен» арт-орталығында Батыс Қазақстан облысының өңірлік тамыз педагогикалық конференциясы өтті. Іс-шараға 800-ден астам қатысушы – мұғалімдер, мектеп пен колледж директорлары, педагогикалық еңбек ардагерлері, ата-аналар комитеттерінің, қоғамдық ұйымдардың және бұқаралық ақпарат құралдарының өкілдері қатысты.

Ресми ашылу алдында қатысушылар мектептер мен колледждердің озық тәжірибелері, педагогтердің инновациялық әзірлемелері және оқушылардың шығармашылық жұмыстары ұсынылған білім беру жобалары көрмесін тамашалау мүмкіндігіне ие болды.

Қатысушылардың ерекше назарын ҚР Оқу-ағарту министрлігі Білім саласында сапаны қамтамасыз ету комитетінің төрағасы Серік Әшіров пен Батыс Қазақстан облысының әкімі Нариман Төреғалиевтің баяндамалары аударды. Олар білім беруді дамытудың стратегиялық бағыттарын айқындап, оның ішінде оқушылардың білім сапасын арттыру, инфрақұрылымды жаңғырту, цифрлық технологияларды енгізу және педагогтерді қолдау шараларын кеңейту қажеттігін атап өтті.

Сонымен қатар конференцияда Білім басқармасының басшысы Елдос Сафиуллин, «Өрлеу» филиалының жетекшісі Софья Измұханбетова, «Ұстаз» ұлттық онлайн академиясының негізін қалаушы Гүлмира Қорағанбаева, «Q-VISION» ЖШС директоры Лесбек Абдықұл, №51 мектептің директоры Жақсалы Жұмабай және Жоғары инженерлік-техникалық колледж директорының орынбасары Тасболат Серікқалиевтің баяндамалары тыңдалды.

Конференция аясында кәсіби жетістіктерімен және саланың дамуына қосқан үлестерімен ерекшеленген 52 педагогты марапаттау рәсімі өтті.

Жиын мерекелік концерттік бағдарламамен қорытындыланды.