Халықаралық волонтерлер күніне орай «Үздік волонтер» салтанатты шарасы

Батыс Қазақстан облысы волонтерлері арасында дәстүрлі түрде өтетін "Үздік волонтер" сыйлығы биыл да жоғары деңгейде ұйымдастырылды. Аталған байқау облыс көлеміндегі волонтерлік қозғалысты дамыту, белсенді азаматтарды ынталандыру және қоғамдық бастамаларды кеңінен насихаттау мақсатында Батыс Қазақстан облысының Қоғамдық даму басқармасының қолдауымен өткізілді.
Игі шараға өңірдің әр түкпірінен 50-ден аса волонтер мен волонтерлік ұйымдар қатысып, қоғамға жасап жүрген елеулі еңбектерін таныстырды. Байқау барысында қатысушылардың әлеуметтік бастамалары, төтенше жағдай кезіндегі көмегі, экологиялық жобаларға қосқан үлесі, жастардың дамуына бағытталған жұмыстары жан-жақты бағаланды.
Байқау нәтижесі бойынша төмендегі номинациялар бойынша үздіктер анықталды:
«Үздік волонтерлік ұйым» — Қаратөбе ауданының «Гимназия қамқоры» волонтерлік ұйымы.
Аталған ұйым аудан жастарын біріктіріп, білім беру, әлеуметтік қолдау және қайырымдылық бағытында тұрақты жобалар жүргізіп келеді.
Төтенше жағдай саласындағы «Үздік волонтер» — Бауыржанова Самал Алтынбекқызы.
Ол төтенше жағдайлар кезінде халыққа көмек көрсету, алдын алу шараларын ұйымдастыру және қауіпсіздік мәдениетін қалыптастыру бағытында үздік еріктілік қызметімен ерекшеленді.
Техникалық және кәсіптік білім беру ұйымындағы «Үздік волонтерлік ұйым» — Батыс Қазақстан жоғары медициналық колледжінің «МедикВолонтер» ұйымы.
Медициналық бағыттағы еріктілер көптеген әлеуметтік нысандарда денсаулық сақтауға қатысты акциялар, алғашқы көмек көрсету тренингтері мен қайырымдылық бастамаларын жүзеге асырып келеді.
Жоғары оқу орнындағы «Үздік волонтерлік ұйым» — Жәңгір хан атындағы БҚАТУ-дың «Жәңгір хан ұрпақтары» волонтерлік ұйымы.
Ұйым студент жастарды қоғамдық белсенділікке тартып, мәдени, әлеуметтік және экологиялық бағыттарда маңызды жобаларды іске асыруымен танылды.
«Үздік волонтерлік бастама» — Сырым ауданының экобастамашылар тобы.
Аталған топ экологияны қорғау, ағаш отырғызу, тазалық мәдениетін қалыптастыру және тұрғындарды табиғатты аялауға шақыру бағытындағы бірқатар сәтті жобаларымен көзге түсті.
«Үздік эковолонтер»— Әсем Бекежанқызы.
Ол өңірдегі экологиялық қозғалыстарға ерекше үлес қосып, табиғатты қорғау бағытында тұрақты бастамалар ұйымдастыруымен және жастарды экосанаға тәрбиелеуімен ерекшеленді.

Бұл байқау — өңіріміздегі волонтерлік қозғалыстың дамуына серпін беретін, жастардың белсенділігін арттыратын, қоғам игілігі үшін қызмет ететін азаматтарды қолдау мақсатындағы маңызды жоба. Волонтерлердің еңбегі бағаланып, жаңа бастамаларға шабыттандырған бұл кеш жылы атмосферада түйінделді.