«Таза Қазақстан» – экологиялық жауапкершілікті арттыруға бағытталған маңызды кездесу

 

    Орал қаласында «Таза Қазақстан» экологиялық акциясы аясында Ж.Досмұхамедов атындағы жоғары педагогикалық колледж студенттерімен ақпараттық-түсіндірме кездесу өтті. Шараның мақсаты – жастарға экологиялық бастамалардың мәнін түсіндіру, табиғатқа жанашыр көзқарас қалыптастыру және өңірдегі экологиялық жобалар туралы кеңірек ақпарат беру.

   Кездесуге БҚО жастармен жұмыс жөніндегі ресурстық орталығының Жастар бастамаларын қолдау бөлімінің кеңесші маманы Еламан Жанзақұлы жастарға экологиялық мәдениетті қалыптастырудың маңызын атап өтті. Ол табиғатты аялау әр азаматтың күнделікті дағдысына айналуы керектігін айтып, студенттерді белсенділікке шақырды. Экологиялық бастамаларға қатысу – қоғамға нақты үлес қосудың тиімді жолы екенін жеткізіп, жастарды өз ортасында экосауаттылықты арттыруға шақырып, сөзін қорытындылады.

    Кездесу барысында студенттер тұрмыстық қалдықтарды дұрыс сұрыптау, жасыл жобаларға қатысу, сенбіліктер мен экологиялық науқандарда волонтер болу мүмкіндіктері туралы маңызды ақпарат алды. Сонымен қатар, өңірдегі өзекті экологиялық мәселелер талқыланып, оларды шешуге бағытталған бастамалар жөнінде ұсыныстар айтылды.

    Кездесу еркін пікір алмасу форматында өтті. Студенттер өз ойларын ортаға салып, экологиялық сауаттылықты арттыруға бағытталған жаңа идеяларымен бөлісті. Мұндай ақпараттық жұмыс жастардың табиғатты қорғау саласына деген қызығушылығын күшейтіп, олардың азаматтық белсенділігін нығайтуға ықпал етті.

#ТазаҚазақстан #экология #тазақала #TazaChallenge