БҚО-да жаңа оқу жылы: жаңа мектептер, білім сапасы және нақты тапсырмалар

 

Батыс Қазақстан облысында дәстүрлі тамыз педагогикалық конференциясы өтті. Жиынға ұстаздар қауымы, білім беру ұйымдарының өкілдері мен қоғамдық ұйымдар қатысты.

Облыс әкімі Нариман Төреғалиев құттықтау сөзінде Мемлекет басшысы Қасым-Жомарт Тоқаевтың білім саласын дамытуға қатысты тапсырмаларының орындалу барысына тоқталып, өңірдің басты басымдығын атап өтті.

Жаңа мектептер мен инфрақұрылым
Соңғы үш жылда облыста 7526 орынға арналған 26 мектеп салынды. Оның ішінде 16 мектеп – КПО компаниясының әлеуметтік жобасы аясында, 7 мектеп – жергілікті бюджет есебінен, 3 мектеп – «Келешек мектептері» ұлттық жобасы бойынша.

Жаңа оқу жылы қарсаңында Казталов ауданында 60 орындық мектеп, Бәйтерек ауданында 600 орындық заманауи «Келешек мектебі» ашылады. Жыл соңына дейін тағы 5 жаңа мектеп пен Орал қаласындағы дарынды балаларға арналған №8 облыстық мектеп іске қосылады.

Қаржы және қолдау
2022 жылмен салыстырғанда білім саласына бөлінген қаржы көлемі 46%-ға өсіп, 207,4 млрд теңгеге жетті. Әрбір оқушыға бөлінетін қаржы көлемі 1,3 млн теңгеге дейін артты.

Нақты тапсырмалар
Облыс әкімі конференцияда мынадай тапсырмалар берді:
- Кәсіптік білім – колледж студенттерін өндірістік процеске көбірек тартуды көздейтін кешенді бағдарлама әзірлеу;
- Ауыл мектептері – жабылу қаупінде тұрған ауылдарды сақтап қалу үшін инфрақұрылымды дамыту және бизнеске жағдай жасау;
- Қосымша білім – жаңа орталықтар ашу және ауыл мектептерін заманауи құрал-жабдықтармен қамтамасыз ету;
- Антибуллинг – психологтардың жалақысын 30%-ға арттыру және орталық қызметкерлеріне арнайы автокөлік бөлу.

Ұстаз – ел болашағының тірегі
Конференцияда үздік педагогтердің еңбегі ерекше атап өтілді. Халықаралық олимпиадаларда жеңіске жеткен шәкірттерді тәрбиелеген ұстаздар мен мемлекеттік наградаларға ие болған мұғалімдер өңір мақтанышы ретінде танылды.

Облыс әкімі: «Ұстаз – ел болашағын қалыптастыратын тұлға. Сіздердің еңбектеріңіз – Әділетті Қазақстанның берік іргетасы», – деп атап өтті.

БҚО әкімдігінің баспасөз қызметі