ЖАҢАӨҢІРДЕ САЙЛАУШЫЛАР БЕЛСЕНДІ

Аудандық мәслихат депутаттығына сайлау жұмыстары Жаңаөңір ауылында да қарқынды жүруде. №317 сайлау учаскесінің жұмысын учаскелік комиссия төрағасы Жанболат Құмарғалиев басқарып отыр.

Сайлау учаскесінде барлығы 97 сайлаушы тіркелген. Комиссия мүшелері азаматтардың дауыс беру құқықтарын қамтамасыз ету мақсатында түскі сағат 12:00-ге дейін үйден дауыс беруге өтініштер қабылдап, ерекше қажеттіліктері бар және жасы үлкен сайлаушыларға жағдай жасауда.

Түстен кейін учаскелік комиссия мүшелері шалғай орналасқан елді мекендер – Сулыкөл, Қызылағаш, Ақшолаң және Сасықкөл қыстақтарына барып, сайлаушыларға өз бюллетеньдерін жеткізбек.