ЖҮРЕГІ ЖЫРҒА ОРАЛҒАН
Бүгін Қазақстан Жазушылар және Журналистер Одағының мүшесі, ҚР Президенті Қ.Тоқаевтың Құрмет грамотасының иегері, Батыс Қазақстан облысының «Үздік ақпарат қызметкері», ақын, ардагер журналист Махмет Қажиахметовтың мерейлі 70 жасына орай «Тілім менің — баға жетпес байлығым» атты балалар арасында көркемсөз байқауы өтті. Байқаудың ашылу салтанатында ақынның өмір жолы туралы бейнежазба көрсетілді. Алмас Елшібеков ақынның сөзіне жазылған «Жетікөл» әнін орындады.
Аудандық ішкі саясат бөлімінің басшысы Тимур Құбаев сөз сөйлеп, ақынның бір басында бірнеше өнері барын, жас ұрпаққа үлгі-өнеге болар тұсы көп екенін жеткізді.
ҚР Президенті жанындағы Ұлттық құрылтайдың мүшесі, Қазақстан Республикасы Жазушылар Одағының мүшесі, «Орал өңірі» газетінің бас редакторы, Қазақстан Жазушылар Одағының Батыс Қазақстандағы өкілі Бауыржан Ғұбайдуллин:
— Махмет ағамыз — ата-анасынан айырылып, артындағы бауырларына қарайлап, ауылда қалған ақын. Әйтпесе, мынадай ақындық дарынмен, қабілет-қарыммен ауқымды әдебиеттің төрінен табылуы тиіс еді. Бірақ, ата-ананың өсиетінен, аманатының орындалғанынан тұңғыш перзентке одан артық мұрат-мақсат жоқ,- деген Бауыржан Файзоллаұлы «Орал өңірі» газетіне М.Қажиахметовтың бір бет өлеңдері берілгенін, «Қазақ әдебиеті» газетіне де жырлары басылып, республикалық «Жұлдыз» журналына мерейтой иесі туралы көлемді мақала жарық көретінін айтты.
Қазақстан Жазушылар Одағының басқарма төрағасы Мереке Құлкеновтың атынан арнайы келген, «Жайық Пресс» ЖШС директоры Дархан Оразов пен «Орал өңірі» газетінің құттықтау хатын оқып берді. Және 100000 теңге сыйақы табыс етті.
Махмет Мұтиұлының ауылдас, жерлестері Салауат Ғабдуллин мен Серікқали Құбиев, Жетікөл ауылдық округінің әкімі Айдархан Рамазанов туған жері атынан шапан жапты.
Әрі қарай оқушылардың көркемсөз байқауы жалғасты. Байқауға онға тарта 10-16 жас аралығындағы оқушы қатысып, ақынның 3-7 өлеңін мәнерлеп оқыды. Ерасыл Файзолла 1, Сезім Тілек пен Марина Сағидуллиева 2, Айгерім Ажиғалиева, Айсезім Самат, Розалия Тұрарбек 3 орындарға ие болды. Жүлделердің сыйлығын ақын өзі табыс етті. Жетікөл ауылдық округінің атынан тағайындалған арнайы жүлде Марина Сағидуллиеваға табысталды.
Ақынға сөз беріліп, өлең жазуға қызығушылығын тудырған әкесі Мүтидің үйге жаздырып алдырған газет-журналдары екенін, әкесі оларды шамның жарығымен дауыстап оқитынын айтты. Алғашқы өлеңдері мұғалімдерге арналған өлеңдер екен, кейін өлеңдері «Қазақстан пионері» газетіне басылды. Әскерде жүргенде де, аудандық «Қызыл ту» газетіне жырлары жарияланып, сарбазға бас редактор Бақтығұл Ойшыбаев хат жазып, жұмысқа шақырды. Кейін елге оралған соң, баспасөз саласындағы қызметі басталды. Өлеңдері байқауларда жүлде алып, республикалық басылымдарда жарық көрді. Мұның бәрі ақынның шығармашылығына қанат бітіре түсті. Махмет Қажиахметов зейнетке шыққанша аудандық газетте еңбек етіп, осы салаға саналы ғұмырын арнады.
Шынар МОЛДАНИЯЗОВА