Үлгілі жанұялар қошеметке бөленді

21 тамызда облыс орталығында ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссияның бастамасымен жыл сайын дәстүрге айналған «Мерейлі отбасы – 2025» ұлттық байқауының облыстық кезеңінің салтанатты марапаттау рәсімі өтті.

Бұл тағылымды шара Батыс Қазақстан облысы әкімінің қолдауымен, Қазақстан Республикасы Конституциясының 30 жылдығы мен Жұмысшы мамандықтар жылы аясында ұйымдастырылды.

Байқауға облыстың 12 ауданынан және Орал қаласынан барлығы 100-ден астам отбасы өтінім берді. Іріктеу кезеңінің қорытындысы бойынша 21 отбасы облыстық кезеңге жолдама алған болатын.

«Мерейлі отбасы – 2025» ұлттық байқауының облыстық кезеңінде Қаратөбе ауданының атынан қатысқан аққозылық Құрманғалиевтер жанұясы жүлделі ІІ орынды иемденіп, 500 мың теңге қаржылай сыйлықпен марапатталды. Сондай-ақ, қаратөбелік Тасқалиевтер “Жұмысшы отбасы – еңбек адамы” аталымымен марапатталды.

Өнегелі дәстүрді дәріптеп, татулық пен берекенің, сыйластықтың үлгісін көрсете білген отбасыларды Батыс Қазақстан облысы әкімінің орынбасары Қайыржан Меңдіғалиев құттықтап, аймақ басшысы Нариман Төреғалиевтің алғысхатын табыстады.

– Ұлттық байқауға белсенді қатысып, отбасылық берекелі шаңырақтың үлгісін көрсеткеніңізге алғыс айтамын.

Шаңырақ – әр адамның киелі бесігі, нәр алатын ұясы. Адам үшін ұшқан ұясының орны бөлек. Сондықтан, конкурстың өскелең ұрпақты тәрбиелеудегі және отбасылық құндылықтарды нығайтудағы орны ерекше.

Отбасы институты – мемлекеттің назарында. Ата – бабаларымыз «Отан отбасынан басталады» - деп бекер айтпаған. Отбасы – мемлекеттің тірегі, қоғамның діңгегі, адамның алтын ұясы, сарқылмас қазынасы.

Жыл сайын Отбасы күні, былтырдан бастап Әке күні, Ана күні аталып өтілуде. Осының бәрі - мемлекет тарапынан ұлттық отбасы институтын сақтауға бағытталған саясаттың көрінісі. Қуатты отбасы – тұрақты мемлекет! Берекелі шаңырақ – еліміздің тірегі, ел бірлігінің кепілі.

Мемлекет басшысымен 2025 жыл – Жұмысшы мамандықтар жылы деп жарияланды. Еңбек адамына үлкен құрмет көрсетілуде. Отбасын сақтау, бала тәрбиелеу, шаңырақтың берекесі мен жылулығын сақтау – ол көрінбейтін үлкен еңбек. Сіздердің әулеттеріңіздегі еңбекқорлық, жауапкершілік, мейрімділік - жастарға үлгі, елге мақтаныш, - деді облыс әкімінің орынбасары Қайыржан Ермекұлы.

Ынтымақ пен еңбекқорлықты ту еткен, ұрпағына саналы тәрбие беріп отырған аққозылық Құрманғалиевтер мен қаратөбелік Тасқалиевтер жанұясы бүгінгі қоғамға үлгі боларлық өнегелі шаңырақ. Әр істі адалдықпен атқарып, үлкенге құрмет, кішіге ізет көрсеткен отбасылар ұрпақ жалғастығын сақтап қана қоймай, жас буынды тәрбиелеуде де елеулі еңбек етіп келеді.