Еңбек заңнамасының нормаларын түсіндіру

Қазақстан Республикасының еңбек заңнамасының білім беру мекемелерінде тиісінше орындалуын қамтамасыз ету мақсатында, 2025 жылғы 18 маусымда мемлекеттік еңбек инспекторы А.Ж.Батыров «БҚО Қазақстандық салалық білім және ғылым қызметкерлерінің кәсіптік одағы» қоғамдық бірлестігімен бірлесіп, облыстағы білім беру ұйымдарының өкілдерімен кездесу ұйымдастырылды.

Іс-шараға қалалық білім бөлімінің басшылығы, қалалық мектептердің директорлары мен есепшілері, Орал қаласының арнаулы орта оқу орындарының басшылары қатысты. Сонымен қатар, «Zoom» қосымшасы арқылы аудандық білім бөлімдерінің өкілдері онлайн форматта қосылды. Қатысушылардың жалпы саны 80-нен асты.

Кездесудің негізгі мақсаты – еңбек заңнамасының нормаларын түсіндіру болды. Кездесу барысында келесі мәселелер қарастырылды:

• жұмыс берушілер мен жұмыскерлердің негізгі құқықтары мен міндеттері;
• мұғалімдер мен оқытушыларды өздерінің еңбек шарттары мен лауазымдық нұсқаулықтарында көзделмеген, оларға тән емес еңбек функцияларын орындауға тартуға жол бермеу;
• алғашқы және келесі жұмыс жылдары үшін төленетін жыл сайынғы еңбек демалысын беру тәртібі және демалыс ақысының төлену мәселелері;
• еңбек шарттарын жасасу және тоқтату тәртібі;
• және басқа да өзекті мәселелер.

Кездесу барысында пікір алмасылып, қатысушылар тарапынан қойылған барлық сұрақтарға мемлекеттік еңбек инспекторы толық әрі жан-жақты жауаптар берді.

Мұндай кездесулерді өткізу білім беру саласындағы жұмыс берушілер мен жұмыскерлердің құқықтық сауаттылығын арттыруға, сондай-ақ еңбек заңнамасын бұзудың алдын алуға ықпал етеді.