Ғұмар Қараштың 150 жылдығына арналған дөңгелек үстел өтті

2025 жылдың 26 тамызында Қадыр Мырза Әлі атындағы мәдениет және өнер орталығында Батыс Қазақстан облысының теолог мамандарының қатысуымен Ғұмар Қараштың 150 жылдығына арналған дөңгелек үстел ұйымдастырылды.

Дөңгелек үстелдің негізгі мақсаты – Ғұмар Қараштың мұрасын насихаттау, теологтардың біліктілігін арттыру және кәсіби байланыстарды нығайту.

Іс-шараны Батыс Қазақстан облысының дін істері басқармасы басшысының міндетін атқарушы Азат Қаратай ашып, рухани тұлғаларды дәріптеудің маңызына тоқталды және Ғұмар Қараштың еңбектерінің бүгінгі күнге дейінгі тағылымы жөнінде сөз сөйледі.

Арнайы шақырылған спикер – Қадыр орталығының басшысы Дәулеткерей Құсайнов қатысушыларға Ғұмар Қараштың өмір жолы, ағартушылық қызметі және еңбектері туралы тың деректер ұсынып, тарихи тұлғаның ұлт тарихындағы рөліне тоқталды.

Шара соңында қатысушылар сұрақ-жауап форматында ой бөлісіп, үздік жауап бергендерге сертификаттар табысталды. Сонымен қатар, кофе-брейк ұйымдастырылып, бейресми жағдайда пікір алмасуға мүмкіндік жасалды. Жалпы, жиынға облыстың барлық аудандарынан 17 теолог маман қатысты.