80 жылдық Жеңіс: Ұлы соғыстың батырлары – ұрпақтың жадында!
Бүгін, 1941–1945 жылдардағы Ұлы Отан соғысындағы Жеңістің 80 жылдығына арналған мерекелік іс-шаралар аясында Бәйтерек ауданының орталығы «Жеңіс» саябағында «Тағзым мен даңқ күні» атты салтанатты шара өтті. Мерекелік шараға аудан тұрғындары, ардагерлер, тыл еңбеккерлері, қоғамдық ұйым өкілдері және жастар қатысты.
Іс-шараның ашылуында аудан әкімі Марат Тоқжанов сөз алып, барша аудан тұрғындарын Ұлы Жеңістің 80 жылдығымен құттықтады. Өз сөзінде ол Жеңістің ұлы маңызын, біздің ұрпаққа аманат етіп қалдырған ардагерлердің ерліктерін жоғары бағалап, осы бейбіт күндердің қадірін білу қажеттігін атап өтті. «Жеңіс – тек өткеннің естелігі емес, бұл біздің болашағымызды қорғаған ерліктің жарқын бейнесі. Ұлы Отан соғысының батырларының ұрпақтары мен бүгінгі қазақстандықтар осы ұлы жеңістің рухын мәңгілікке сақтау жолында бірлесе жұмыс істеуде», – деп аудан әкімі М.Тоқжанов сөзін қорытындылады.Шара барысында Ұлы Отан соғысында қаза тапқан жауынгерлердің рухына бір минут үнсіздікпен тағзым етілді. Бұл сәт соғыстың ауыр зардаптарын және қаза тапқан батырларымыздың жанқияр ерлігін еске алу мақсатында өткізілді.Гүл шоқтары мен гүл себеттерін қою рәсіміне аудан әкімі мен аудандық ардагерлер кеңесінің төрағасы, аудандық мәслихаттың төрағасы, қоғамдық ұйым өкілдері, тыл еңбеккерлері мен ардагерлердің ұрпақтары қатысты. Әр гүл – бейбітшілік пен ерлікке құрметтің белгісі.
Салтанатты шараның тағы бір ерекшелігі – аудан жастарының қатысуы. Олар Ұлы Жеңістің маңыздылығын, елдің болашағына деген жауапкершілікті жете түсініп, бұл мерекені ұрпақтан ұрпаққа жеткізу міндеті екендігін ерекше атап өтті.
Ұлы Жеңіс күні – біз үшін тек тарихи дата емес, бұл – мәңгілікке жалғасатын батырлардың есімдерін ұлықтау, олардың ерліктері мен қажырлы еңбегін ұрпақтан ұрпаққа жеткізуіміз керек деген ұғымды білдіреді.