КӘМЕЛЕТКЕ ТОЛМАҒАНДАРДЫҢ ҚҰҚЫҚТАРЫН ҚОРҒАУ МӘСЕЛЕЛЕРІ ҚАРАЛДЫ
Бәйтерек ауданында кәмелетке толмағандардың ісі және олардың құқықтарын қорғау жөніндегі комиссияның кезекті отырысы аудан әкімінің орынбасары Ерлан Галиевтің төрағалығымен өтті.
Отырыста мектеп жасындағы балалардың сабаққа қатыспау себептері жан-жақты талқыланды. Әрбір жағдай бойынша нақты деректер тыңдалып, балалардың білім алуына кедергі келтіретін әлеуметтік, тұрмыстық және психологиялық факторлар сарапталды.
Сонымен қатар ата-аналардың жауапкершілігі, білім беру ұйымдарының жұмысы және мүдделі мекемелердің өзара іс-қимылы қарастырылды. Балалардың білім алу құқығын қамтамасыз ету, құқық бұзушылықтардың алдын алу және олардың толыққанды дамуына жағдай жасау бағытында нақты ұсыныстар мен тиісті шешімдер қабылданды.
Жиын барысында ата-аналарға Қазақстан Республикасының қолданыстағы заңнамасына сәйкес Әкімшілік құқық бұзушылық туралы кодексінің 409-бабы талаптары түсіндіріліп, жауапкершілік шаралары туралы ескертілді.
Комиссия тарапынан тиісті органдарға нақты тапсырмалар беріліп, әрбір жағдай тұрақты бақылауға алынды.