Бәйтерек ауданының Янайкин, Шалғай ауылдық округтері әкімдерінің сайлауы тағайындалды

2025 жылғы 30 шілде күні Бәйтерек ауданының аумақтық сайлау комиссиясы Янайкин, Шалғай ауылдық округтері әкімдерінің сайлауы белгіленуіне орай отырыс өткізді. Отырысқа аудандық жастармен жұмыс жөніндегі ресурс орталығы мен аудандық қоғамдық- саяси «Ауыл тынысы» газетінің өкілдері қатысты.
Комиссия отырысында Янайкин, Шалғай сайлау округтерін құру туралы және аталған ауылдық округ әкімдерінің сайлауын 2025 жылғы 7 қыркүйекке тағайындау туралы комиссия қаулылары қабылданды. Ауылдық округ әкімдері сайлауын тағайындау қаулыларына сәйкес сайлауды әзірлеу мен өткізу жөніндегі негізгі іс-шараларының күнтізбелік жоспары бекітілді.
2025 жылғы 31 шілде мен 12 тамыз сағат 18.00-ге дейін аудандық аумақтық сайлау комиссиясы ауылдық округ әкіміне кандидаттардың ұсыну құжаттарын қабылдайды, сонымен қатар кандидаттарды тіркеу ағымдағы жылғы 17 тамыз сағат 18.00-де аяқталады.
2025 жылғы 17 тамыз сағат 18.00-ден кейін кандидаттардың сайлау алдындағы үгіті басталады және 2025 жылғы 6 қыркүйек сағат 00.00-де аяқталады.
Сайлауды ұйымдастыру мен өткізуді Шалғай ауылдық округі бойынша №167, Янайкин ауылдық округі бойынша №177 учаскелік сайлау комиссиялары өткізетін болады.

Бәйтерек ауданының аумақтық сайлау комиссиясы