70 жас – ұлағатты ғұмыр белесі!
Ағымдағы жылдың 20 маусымында ұлағатты ұстаз, бар саналы ғұмырын білім мен бала тәрбиелеу ісіне арнаған Валентина Семеновна Леонтьева 70 жасқа толды. Аудан әкімі Марат Лұқпанұлы Тоқжанов мерейтой иесін арнайы қабылдап, алғыс хат пен естелік сыйлықтар табыстады.
Марат Тоқжанов құттықтау сөзінде:"Сіз сияқты адал еңбек етіп, бірнеше буынға білім мен тәрбие берген тұлғалар – біздің қоғамның алтын қазынасы. Еңбегіңіз ерен, үлгіңіз ұлағат. Жастар сізден тәлім алып, өнеге көруі тиіс. Деніңізге саулық, отбасыңызға амандық, мерейлі жасыңызбен шын жүректен құттықтаймын!" – деп жүрекжарды лебізін білдірді.
В.С.Леонтьева – Батыс Қазақстан облысы, Бәйтерек ауданы, Көшім ауылындағы жалпы орта білім беретін мектептің ардагер ұстазы. Ол осы мектепте 39 жыл ұстаздық етіп, соның 31 жылында мектеп директоры қызметін абыроймен атқарған. Оның басшылығымен білім ордасы аудан көлемінде үздіктер қатарынан көрінді, ал шәкірттері ҰБТ мен пәндік олимпиадаларда жоғары нәтижелерге қол жеткізді. Қазіргі уақытта жергілікті қоғамдық кеңестің мүшесі. Сонымен қатар Валентина Семеновна қоғамдық өмірге белсене араласып, ауылдық және аудандық мәслихат депутаты, түрлі кеңес пен комиссия мүшесі ретінде де танылды. Еңбегі елеп, «ҚР білім беру ісінің үздігі», «ҚР Тәуелсіздігіне 10 жыл» сынды медальдармен және бірнеше алғыс хаттармен марапатталған.
Ардақты Валентина Семеновна, мерейтойыңыз құтты болсын!