Ұлы Отан соғысының ардагері өмірден озды
Бүгін Ұлы Отан соғысының ардагері, Есімов Сұпығали ағамыз жарық дүниемен қош айтысты.
Ұлы Жеңіс күні қарсаңында қаралы хабарды естіп, қабырғамыз қайысып отыр. Әулетіне, туған-туыстарына, ел-жұртқа қайғыра көңіл айтамын. Жұмақта нұры шалқығай!
Есімов Сұпығали 1926 жылы 14 қаңтарда Жаңақала ауданының 24-ауылында шаруа жанұясында дүниеге келген. 1944 жылдың қараша айында Кеңес әскері қатарына алынып, Чкалов қаласында әскери оқу-жаттығудан өтеді.
Сержант шенімен Жуков басқаратын І Украина майданында болған. 1170 атқыштар полкінде пулеметші болып жауға қарсы жан аянбай соғысқан. Ұрыстарда тайсалмайтын өжеттігіне, қиын сәттерден қаймықпаған ерліктеріне сай, бөлімше командирі боп тағайындалды. 1945 жылы 4 сәуірден бастап бөлімшесімен Берлинді алуға арналған қиян-кескі ұрыстардың алдында жүрді. Жеңіс жалауын фашист ордасының төбесінде желбіретуге қаруластарымен бірге қанын да төкті, терін де төкті.
Кейіннен соғыс аяқталған соң, Эстониядағы құпия атом зауытында, содан кейін 1949-1953 жылдары 3278 әскери бөлімшеде өз қызметтерін абыроймен атқарды.
Әскер қатарынан 1954 жылы елге оралып, бейбіт майдандағы еңбекке белсене араласады. 1955-56 жылдары Ақтөбе облысында Магаджан ауылшаруашылық мектебін бітірген. Ауданымыздағы бұрынғы Батурин (қазіргі Ақсуат) кеңшарында 20 жыл қой бағып, еңбекқорлығымен, ұқыптылығымен көзге түседі. 1974-1986 жылдары аудандағы су шаруашылығы саласында адал қызмет атқарған. Сол ұйымнан зейнеткерлікке шығады.
Аудан әкімі Қ.Айтмұхамбетов