ҚР Көлік министрі Air Astana президентін қабылдады

Питер Фостер Көлік министрі Марат Қарабаевқа компанияның IPO-ға дайындығы туралы айтып берді

Кездесу барысында «Эйр Астана» АҚ президенті П.Фостер авиакомпанияның 2024 жылы IPO-ға шығуға дайындығы туралы, сондай-ақ келесі жылы Токио мен Сингапурға, ал 2025 жылы Нью-Йорк бағытында жаңа рейстердің ашылуы туралы баяндады.

Сонымен қатар ол биыл 8 айдың ішінде «Эйр Астана» АҚ 3 жаңа әуе кемесін сатып алғанын хабарлады. Атап айтқанда, 180 орынға шақталған 2 Airbus A321CEO және сыйымдылығы 188 орындық Airbus A320NEO.

Жылдың соңына дейін тағы бес Airbus A320 келеді деп күтілуде. Бұл өз кезегінде ұшу жүйелілігін және әуе көлігінің қолжетімділігін арттыруға мүмкіндік береді деп жоспарланып отыр.

Кездесу соңында Марат Қарабаев ұшу қауіпсіздігінің жоғары деңгейін қамтамасыз ету, авиабилеттер құнын төмендету және Қазақстанның транзиттік-логистикалық әлеуетін арттыру үшін жағдай жасау жөніндегі жұмысты жалғастыруды тапсырды.