«САЛАУАТТЫ АНА» – АНАНЫҢ АМАНДЫҒЫ, СӘБИДІҢ САУЛЫҒЫ ҮШІН ПАНСИОНАТ АШЫЛДЫ

Бүгінде ана мен бала денсаулығы — мемлекеттің басты назарында. Осы мақсатта Атырау облысында ерекше бір бастама қолға алынды. Шалғай ауылдарда тұратын, тәуекелі жоғары жүкті әйелдерге енді облыс орталығында арнайы жағдай жасалып отыр.

2025 жылдың қыркүйек айында Атырау облыстық перинаталды орталық базасында «Салауатты Ана» пансионаты ашылды. Бұл – жүктіліктің соңғы кезеңіндегі аналарға жай ғана баспана емес, өмірге аман-есен ұрпақ әкелуге дайындалатын қауіпсіз мекен. Мұнда шалғай аудандардан келген, күні жетіп отырған болашақ аналар босану уақытына дейін дәрігерлердің тікелей бақылауында болады.

«Салауатты Ана» – тек бір нысанның атауы емес, бұл – ананың жайлылығы, медициналық қолдау, психологиялық дайындық пен болашақ ұрпақтың өмірі үшін жасалған нақты қадам. Босанудан кейінгі кезеңде асқынуы бар әйелдер де толық оңалудан өтеді. Бұл – тек бүгіннің емес, ел болашағының кепілі.

Әрбір анаға амандық, әр сәбиге шат күлкі сыйлау – біздің ортақ мақсатымыз.