Атырауда еліміздің батысындағы ең үлкен мәдени нысанның құрылысы басталды

Конституция күніне орай Атырау қаласында 1200 орындық концерттік зал мен тарихи-өлкетану музейінің іргетасына капсула қою рәсімі өтті.

Жаңа ғимараттың жалпы құрылыс алаңы – 38 173 м². Мәдени кешен үш функционалды блоктан тұрады:

Бірінші блок – концерт залы: көрмендерге арналған 1200 орындық және өзге де сегіз түрлі зал, конференц-бөлмелер, репетициялық кабинеттер және дыбыс жазу студиясы.

Екінші блок – тарихи-өлкетану музейі: цифрлық және ғылыми кітапхана, ғылыми-зертханалық кешен, шеберлік бөлмелер, архивтік қор сақтау орындары, көрме залдары мен экспозициялық кеңістіктер.

Үшінші блок – «Домбыра» монументіндегі көрініс алаңы: кассалық галерея және қосалқы қызметтік бөлмелер.

Әр бөлімде әкімшілік және қосалқы техникалық бөлмелер қарастырылған.

Салтанатты іс-шараға аймақ басшысы Серік Шәпкенов қатысып, Президенттің бастамасымен қолға алынған жобаның маңыздылығына тоқталды.

- Мемлекет басшысы өңірге жұмыс сапарымен келгенде Атырауға жаңа үлкен мәдени нысан салу керектігін айтты. Сондай-ақ оған Құрманғазы атамыздың есімін беруді ұсынған еді. Міне, бүгін еліміздің батысындағы ең үлкен мәдени нысанның құрылысы басталып жатыр. Бұл ғимарат тек архитектуралық нысан емес, рухани жаңғырудың жарқын көрінісі, ұлт мәдениетінің алтын көпірі, өнер мен өнегенің ордасы болмақ. Атыраулықтар үшін рухани нәр алатын, ұлттың ұлы мұрасын насихаттайтын мәдени орталық болары сөзсіз,- деді облыс әкімі Серік Шәпкенов.

Айта кетейік, мәдени кешеннің аумағы толықтай абаттандырылады.