Болат Ақшолақов: “Бюджеттің әрбір теңгесі орнымен жұмсалуы керек”

Атырауда облыс әкімі Болат Ақшолақовтың төрағалығымен жиын өтіп, онда бюджет қаражатын тиімді жұмсау мәселесі қаралды.

Бюджеттің қазіргі жағдайы жөнінде облыс әкімінің орынбасары Жасұлан Бисенбиев баяндады. Жиында басымдыққа ие нысандардағы жұмысты уақытында аяқтау және мердігер ұйымдарға талапты күшейту жөнінде баса айтылды.

Облыс әкімі қаржыны бірінші кезекте жаңа нысандарды ашуға емес, іске асырылып жатқан жобаларды аяқтауға бөлу керегін атап өтті. Оның айтуынша, мемлекеттік жобаларды жүзеге асырғанда жұмыстың құнын ғана ескеріп қоймай, мердігер ұйымның қаржылық тұрақтылығы, олардың өндірістік мүмкіндігі мен қабілеті мойнына алған міндеттемелерді уақытында орындауға қаншалықты жеткілікті екені назарға алынуы тиіс.

Облыс әкімі жиын соңында келесі кезеңге бюджетті жоспарлау тәсілдерін қайта қарап, мемлекеттік жобаларды іске асыруға тек қаржылық жағынан тұрақты, айналымда өз қаражаты бар мердігерлерді тарту жөнінде тапсырма берді. Бұл бюджеттен аванстық төлем күтпей-ақ, жұмысты уақытында бастап кетуге, құрылысты үздіксіз жүргізуге және мердігердің міндеттемелерді орындау жауапкершілігін арттыруға мүмкіндік береді.

Аймақ басшысының айтуынша, мемлекеттік органдар мен мердігер ұйымдардың қызметі бюджет қаражатының орнымен жұмсалуымен, жұмыс сапасы мен мерзімінің сақталуымен бағаланады.