Атырауда «Біз таңдаған жол» волонтерлік жобасы қорытындыланды

Халықаралық волонтерлер күніне орай Азаматтық орталықтың бастамасымен «Біз таңдаған жол» жобасының қорытынды шарасы өтті. Кездесу Махамбет ауданындағы «Сарайшық» мемлекеттік тарихи-мәдени музей-қорығында ұйымдастырылып, өңірдің 40-қа жуық күміс волонтері қатысты.

Бағдарлама аясында журналист және медиа-тренер Салтанат Оңғардың қатысуымен «Біз таңдаған жол: жақсылыққа бағыт» тақырыбында семинар-тренинг өтті. Қатысушылар көшбасшылық, тиімді коммуникация, эмоционалдық интеллект және командамен жұмыс бағытында практикалық дағдыларын жетілдірді.

Жиын барысында «Үздік күміс волонтер» жобасының жеңімпаздары марапатталып, қатысушыларға сертификаттар табысталды. Іс-шара соңында волонтерлер музей-қорық нысандарымен танысып, тарихи-мәдени мұраларды аралады.