Атырауда «Жасыл ел» жастар еңбек жасағының XXI еңбек маусымы қорытындыланды

ХХІ еңбек маусымына облыс бойынша 1000 жас қамтылып, салтанатты жабылу кешінде белсенділігімен ерекшеленген 24 сарбазға 120 мың теңге көлемінде сыйақы және ағылшын тілі курсына тегін сертификат табысталды. Ал жобаның үйлестіруші мамандары «Жасыл ел» республикалық штабының алғыс хатымен марапатталды.

Салтанатты жиынға облыс орталығы мен аудандық округтерден келген «Жасыл ел» сарбаздары, қала және аудан координаторы мен облыстық штаб қызметкерлерінен 100-ге жуық адам қатысты.

Жоба өткен үш айда жас сарбаздар еңбекпен қатар экологиялық бастамаларға белсене қатысты. Атап айтсақ «Таза Қазақстан» акциясы 9 рет өткізіліп, 1300 адам қамтылды. «Trashtag Atyrau» акциясы – 56 рет, саябақтар мен мүсіндерді қалпына келтіру үшін «Upgrade Atyrau» – 24 рет және тұрғындар арасында 10 экошара өтті.

Сонымен қатар сарбаздардың ұйымшылдығын арттыру мақсатында «Zhasyl el Quest» және «Zhasyl el Puzzle» ойындары ұйымдастырылды.

«Жасыл ел» - жастарды маусымдық жұмыспен қамти отырып, өңірде көгалдандыру және абаттандыру жұмыстарын жүргізу, экологиялық мәдениетті қалыптастыру мақсатын көздейді.

Жобаны Атырау облысы Ішкі саясат басқармасының қолдауымен, «Инфо Орталық» қоғамдық бірлестігі жүзеге асырды.