Атырауда ерекше жастар «Креатив LAB» қолөнер тренингінде бас қосты

14-35 жас аралығындағы мүгедектігі бар жастарға арналған «Ұшқын» жобасы аясында 3 күндік «Креатив Lab» қолөнер тренингі өтіп, 20-дан астам жасты қамтыды.

Тренингтің мақсаты – жастардың шығармашылық әлеуетін дамыту және жаңа дағдыларды меңгеруіне мүмкіндік жасау.

Алғашқы күні қатысушылар ұлттық нақыштағы этно-стильде суреттер салып, шопер сөмкелерді өнер туындысына айналдырды. Ал екінші күні ине-жіп ұстау техникасын үйреніп, ұлттық ою-өрнектерді қиып, бас киімдерге кестелеу жұмыстарын орындады. Тренингтің соңғы күні қатысушылар бұйымдар жасап, жаңа әрі қызықты дағдыларды меңгерді.

Шығармашылық атмосферада өткен сабақта жастар бір-бірімен тәжірибе алмасып, жаңа шабыт алды.

Соның бірі, тренинг барысында қатысушы Наркиза Рашпаева футболкаға сурет салып, қолөнерін қыркүйекте өтетін жәрмеңкеде сатпақшы.

Іс-шара облыстық Ішкі саясат басқармасының қолдауымен, «Ерекше Ана – Ерекшем 16+» қоғамдық қорының ұйымдастыруымен өтті.