Облыстық «Тәуелсіздік ұрпақтары» грант жобасы бойынша баспасөз брифингі өтті

Бүгін Атырау қаласының Жастар ресурстық орталығы басшысының орынбасары Еркебұлан Мутигуллиннің қатысуымен облыстық «Тәуелсіздік ұрпақтары» грант жобасы бойынша баспасөз брифингі өтті.

Биыл гранттар саны өткен жылмен салыстырғанда 80%-ға артып, жоба алты негізгі бағыт бойынша жүзеге асады. Атап айтсақ, ғылым, мәдениет, ақпараттық технологиялар, бизнес, медиа және волонтерлік. Әр бағыттан үш үздік жоба іріктеліп, 18 жеңімпаздың әрқайсысына 1 миллион теңгеден қаржылай қолдау көрсетіледі.

«Тәуелсіздік ұрпақтары» гранты – жастардың шығармашылық әлеуетін арттыруға және әлеуметтік бастамаларды қолдауға бағытталған. Бұл – жастардың тек идея ұсынумен шектелмей, оны нақты іске асыруына берілген мүмкіндік. Биыл өтінім берушілердің санын 400-ге жеткізу көзделді, бұл - өткен жылғы көрсеткішпен салыстырғанда екі есеге көп.

Жоба аясында қатысушылар үшін арнайы екі күндік оқыту-тренингтері ұйымдастырылады. Онда жоба жазу, смета құру және презентация жасау бойынша тәжірибелік білім берілмек.

Еске салайық, 2024 жылы грант бес бағытта беріліп, 139 өтінімнің ішінен техникалық іріктеуден 94-і өтті. Соңында 10 үздік жоба бір миллион теңгелік грантқа ие болды. Олардың ішінде экология, цифрлық білім, дәстүрлі өнер мен отандық өнім өндірісін дамыту секілді бастамалар бар.

Грантқа 14-35 жас аралығындағы Қазақстан азаматы үміткер бола алады. Өтінімдер 6 шілдеге дейін қабылданып, жеңімпаздарды марапаттау 12 тамызда Жастар күніне орай өткізіледі.