Атырауда NEET санатындағы жастарға арналған «Isker Adamdar» жобасы іске қосылмақ

Атырау қаласында жастарды жұмысшы және техникалық мамандықтарға баулуды мақсат еткен «Isker Adamdar» жобасы өз жұмысын бастайды. Жобаның негізгі мақсаты – 18 бен 35 жас аралығындағы NEET санатындағы жастарға кәсіби бағыт-бағдар беріп, оларды еңбек нарығына бейімдеу.

200 жасты қамтуды көздеген жобаның негізгі бағыттары:

• 3 кезеңдік тренингтер: қатысушылар психологиялық тұрақтылық, кәсіпкерлік дағдылар және заманауи маркетинг негіздері бойынша арнайы сабақтардан өтеді;
• 10 бағыттағы оқыту курстары: жылыжай маманы, жиһаз құрастырушы, сылақшы, кафель орнатушы, барбер-шоп, бариста-бармен, шаштараз, аспазшы, массажист, бет әрлеуші (визажист) мамандықтары қамтылған;
• Мемлекеттік қолдау: белсенділік танытқан 50 қатысушының әрқайсысына 250 000 теңге көлемінде тауар түрінде шағын грант, ал үздік шыққан 10 қатысушыға 350 000 теңге көлемінде қаржылай қолдау көрсетіледі;
• Мониторинг және тәжірибе алмасу: қатысушылардың жобалары тұрақты бақылауға алынып, кәсіпкерлермен кездесулер ұйымдастырылады.

Жобаға қатысу үшін жастар Instagram әлеуметтік желісіндегі @Isker_аdamdar парақшасына кіріп, био бөлімінде көрсетілген сілтеме арқылы онлайн сауалнаманы толтыруы қажет.

Айта кетейік, «Isker Adamdar» жобасы Атырау облысы Ішкі саясат басқармасының қолдауымен, «Қоғамдық денсаулық сақтау институты» жекеменшік мекемесінің ұйымдастыруымен жүзеге асырылады.