АТЫРАУДА ОБЛЫСТЫҚ ҒЫЛЫМИ-ӘДІСТЕМЕЛІК КОНФЕРЕНЦИЯ ӨТТІ

Атырау облысында ұлы ақын Абай Құнанбайұлының 180 жылдығына орай «Абайдың «Толық адам» ілімі және ұлттық құндылық» атты облыстық ғылыми-әдістемелік конференциясы өтті.

Конференция мақсаты - Абай Құнанбайұлының «Толық адам» ілімін терең талдау арқылы ұлттық тәрбие, адамгершілік құндылықтар мен қазіргі білім беру жүйесіндегі маңызын айқындау.

 

Конференция жұмысына Атырау облысы Мәдениет және  тілдерді дамыту басқармасының өкілдері, «Ұлттық құндылықтар академиясы» республикалық қоғамдық бірлестігінің төрағасы мен бірлестік мүшелері, Халықаралық “Қазақ тілі қоғамы” қоғамдық бірлестігінің мүшелері, Қазақстан-Британ техникалық университетінің, Әл-Фараби атындағы ҚазҰУ, Абай атындағы ҚазҰПУ, Х.Досмұхамедов атындағы Атырау университетінің. профессорлары мен  ғалымдары, сонымен қатар кітапханашылар, ұстаздар мен бұқаралық ақпарат құралдарының өкілдері қатысты.

 

  Конференцияда Абайдың адамзаттық және рухани-адамгершілік мұрасының қазіргі қоғамда тәрбиелік мәні, оның жастар санасына әсері, білім беру саласындағы қолдану жолдары жан-жақты қарастырылды.

Педагог-ғалымдар мен әдіскерлер ғылыми баяндамаларын ұсынып, өздерінің практикалық зерттеулерін ортаға салды.

Тәрбие мен білім беру саласына қатысты әдістемелік ұсыныстар қаралып, тәжірибе алмасуға арналған алаң ұйымдастырылды.

Шара қорытындысында ұлттық құндылықтарды білім беру мазмұнына жүйелі енгізу және Абай мұрасын тәрбие жұмысының өзегіне айналдыру бойынша нақты ұсыныстар мен әдістемелік ұсынымдар әзірленіп, тиісті мекемелерге жолданатын болды.