Қауіпсіз еңбек- өмір кепілі

 

Қандай жағдайлар міндетті түрде тергеп- тексерілуге жатады?

    Қазақстан Республикасы Еңбек кодексінің 186-бабы 1-тармағына сәйкес, қызметкерлердің еңбек қызметіне байланысты денсаулығына келтірілген зиян келесі жағдайларда тергеп-тексерілуге жатады:

• еңбекке уақытша немесе тұрақты жарамсыздыққа әкелген;
• қызметкердің қайтыс болуына әкелген жағдайлар.

 Өндірістегі жазатайым оқиғаларды кім тергейді?

Оқиғаның ауырлығына байланысты тергеп-тексеру тәртібі әртүрлі болады.

Ауыр, топтық және өліммен аяқталған жазатайым оқиғалар ерекше бақылауда болады және оларды тергеп-тексеру мемлекеттік еңбек инспекторларының міндетті қатысуымен жүргізіледі.

Жеңіл өндірістік жазатайым оқиғаларды жұмыс беруші өзі құрған комиссия арқылы дербес тергейді.

Комиссия құрамына әдетте:

• комиссия төрағасы – ұйым басшысын емес оның өкілі;
• еңбек қауіпсіздігі және еңбекті қорғау жөніндегі маман;
• жұмыскерлердің немесе кәсіподақтың өкілі кіреді.

Жазатайым оқиға туралы мемлекеттік органдарға қандай мерзімде хабарлау қажет?

Қазақстан Республикасы Еңбек кодексінің 187-бабы 2-тармағының 1) тармақшасына сәйкес, жұмыс беруші еңбек қызметіне байланысты болған жазатайым оқиға туралы мемлекеттік органдарға дереу, бірақ бір тәулік ішінде хабарлауға міндетті.

 Кәсіпорындарда бақылау қалай жүзеге асырылады?

Еңбек  қауіпсіздігі және еңбекті қорғау талаптарының сақталуына ішкі  бақылауды қамтамасыз ету мақсатында өндірістік қызметпен айналысатын және жұмыскерлер саны елу  адамнан асатын ұйымдарда жұмыс беруші еңбек қауіпсіздігі және еңбекті қорғау қызметін құрады.

Бұл  қызмет ұйымның бірінші басшысына немесе оның уәкілеттік берген тұлғасына тікелей бағынады.

Еңбек қауіпсіздігі мәселелері бойынша қызметкерлерді оқыту және білімін тексеру қаншалықты жиі жүргізілуі тиіс?

• Жұмысшы кәсіптеріндегі қызметкерлер еңбек қауіпсіздігі мәселелері бойынша оқыту мен білімін тексеруден жылына кемінде бір рет өтеді.
• Ұйым басшылары және еңбек қауіпсіздігі мен еңбекті қорғауды қамтамасыз етуге жауапты тұлғалар оқыту мен білімін тексеруден кемінде үш жылда бір рет өтеді.

Өндірістік жарақат алған қызметкерге қандай өтемақылар төленеді?

 

• Емделу және қалпына келу кезеңінде уақытша еңбекке жарамсыздық бойынша төлем (аурухана парағы бойынша төлем);
• Жарақат салдарынан еңбекке қабілеттілігін уақытша немесе тұрақты жоғалтқан жағдайда жоғалтылған жалақыны өтеу;
• Емдеу мен оңалтуға жұмсалған шығындарды өтеу, оның ішінде медициналық көмек, дәрі-дәрмек, протездеу, санаторий-курорттық емдеу және басқада қажетті шаралар;
• Еңбек міндеттерін орындау кезінде жазатайым оқиғалардан қызметкерді міндетті сақтандыру бойынша сақтандыру төлемдері.

 Қызметкер жұмыс орнында қауіпті жағдайды байқаса, не істеуі керек?

• Қауіпті жағдай туралы дереу өзінің тікелей басшысына, немесе еңбекті қорғауғ ажауапты тұлғаға хабарлау;
• Өмірімен денсаулығына нақты қауіп төнген жағдайда жұмысты тоқтату;
• Арнайы білімді, рұқсатты талап ететін немесе жазатайым оқиғаға әкелуі мүмкін қауіпті өз бетінше жоюға әрекет жасамау;
• Қауіпті жағдайды жою және қауіпсіздік шараларын сақтау бойынша жұмыс берушінің нұсқауларын орындау.