Атырау облысында 140 мыңға жуық оқушы жазғы демалыспен қамтылады

Балалардың жазғы демалысын сапалы ұйымдастыру, олардың қауіпсіздігін қамтамасыз ету және әрбір оқушыға ұмытылмас жазғы әсер сыйлау мақсатында Атырау облысында кешенді жұмыстар жүзеге асырылуда. Жазғы сауықтыру маусымы аясында мыңдаған бала лагерьлерде демалып, танымдық, спорттық және шығармашылық бағдарламаларға қатысып, бос уақытын тиімді өткізіп жатыр. Білім беру басқармасының бас маманы Қадыржан Сапаровтың айтуынша, оқушылардың жазғы демалысын қауіпсіз, сапалы әрі мазмұнды ұйымдастыру мақсатында Атырау облысы әкімінің орынбасары Дарын Шамұратовтың төрағалығымен облыстық штаб құрылып, жауапты мемлекеттік органдармен бірлескен кешенді жұмыстар қолға алынған.

• Қазіргі уақытта облыста балалардың жазғы демалысын ұйымдастыру барысында қауіпсіздік мәселесіне ерекше басымдық берілуде. Меншік нысанына қарамастан барлық балаларды сауықтыру ұйымдарының қызметі тұрақты бақылауда. Санитариялық-эпидемиологиялық талаптардың сақталуы, өрт қауіпсіздігі, медициналық қызмет көрсету және балалардың өмірі мен денсаулығын қорғау бағытындағы жұмыстар үздіксіз жүргізілуде. Барлық балалар лагерлеріне полиция инспекторлары бекітіліп, басқарма жанынан азаматтардың өтініштері мен сауалдарын жедел қабылдайтын арнайы колл-орталықтар жұмыс істеуде. Балалардың сапалы тамақтануын қамтамасыз ету мақсатында лагерьлерде бекітілген ас мәзірлері қолданылып, тамақтану сапасы мен көрсетілетін қызметтерге тұрақты мониторинг жүргізілуде,- дейді Қ.Сапаров.

Биыл облыстағы 1–10 сыныптарда білім алатын 147 мың оқушының 139 746-сы немесе 95 пайызы жазғы демалыспен және сауықтыру шараларымен қамту жоспарланған. Өткен оқу жылымен салыстырғанда қамту көрсеткіші 2 пайызға артқан.

Жазғы маусымда облыстың теңгеріміндегі үш сауықтыру ұйымында 3 018 оқушы демалуда. Балалар Ресей Федерациясының Железноводск қаласындағы «Қазақстан Геологі» емдеу пансионатына маусым айында барып тынықса, қазіргі кезде Индер ауданындағы «Жас Өркен» сауықтыру лагерінде – 1 008, ал Махамбет ауданындағы «Арай» сауықтыру лагерінде 480 оқушы демалуда.

Сонымен қатар, жалпыға міндетті білім беру қоры есебінен 1 367 оқушы республиканың өзге өңірлеріндегі сауықтыру ұйымдарына жіберілді. Өңірдегі өндірістік кәсіпорындар мен мекемелердің қолдауымен 3 мыңнан астам оқушының жазғы демалысы ұйымдастырылған.

• Балаларды жаппай қамту мақсатында 123 801 оқушы мектеп жанындағы тамақтандыратын және бейіндік лагерьлерге қатысты. Ал, 10 230 оқушы шатырлы және киіз үй лагерьлерінде түрлі танымдық, спорттық және мәдени бағдарламаларға қатысып, жазғы демалыстарын қызықты өткізіп жатыр. Әлеуметтік қолдауды қажет ететін және тәуекел тобына жататын 180 оқушы Алматы қаласындағы сауықтыру ұйымдарына жіберілді. Сонымен қатар, «Теңізшевройл» компаниясының қолдауымен ұйымдастырылған «Асыл мұра» этнолагерінде 80 бала ұлттық құндылықтарды дәріптеуге бағытталған іс-шараларға қатысады.  Ал, С. Мұқашев атындағы Атырау политехникалық жоғары колледжінің базасында жұмыс істеп жатқан «Summer Skills Camp» жазғы лагерінде оқушылар кәсіптік бағдар беру бағдарламаларына қатысып, практикалық дағдыларын дамытты, дейді Қ.Сапаров.

Жазғы демалыс кезеңінде балалардың қауіпсіздігін қамтамасыз ету, олардың бос уақытын тиімді ұйымдастыру және сауықтыру шараларымен барынша қамту бағытындағы жұмыстар облыс көлемінде жалғаса бермек.