Қазақстан Республикасы Атом энергиясы жөніндегі агенттігі жанындағы Қоғамдық кеңестің отырысы өтті

Қазақстан Республикасы Атом энергиясы жөніндегі агенттігінде (бұдан әрі – Агенттік) Қоғамдық кеңестің кезекті отырысы өтті. Іс-шараға Қоғамдық кеңес төрағасы Сәлімбай Шүнеев, Қоғамдық кеңес мүшелері, Агенттік төрағасының орынбасарлары, ведомстволық бағынысты ұйымдардың басшылары қатысты.

Отырыс басында Агенттік төрағасының орынбасары Әсет Махамбетов атом энергетикасын дамыту және АЭС салу жобаларын іске асырудың ағымдағы жағдайы туралы баяндама жасады. Жобаларды уақтылы және тиімді іске асыру үшін мемлекеттік органдардың, салалық ұйымдар мен бейінді компаниялардың үйлестірілген іс-қимылдарының қажеттілігі жеке атап өтілді.

Тақырыпты жалғастыра отырып, «Қазақстандық атом электр станциялары» ЖШС-нің бас директоры Ернат Бердіғұлов АЭС салу жобаларын іске асырудың практикалық аспектілеріне жан-жақты тоқталды. Ол компанияның жобаларды іске асырудың белсенді кезеңіне көшкенін, ауқымды ұйымдастырушылық өзгерістер жүргізілгенін, ҚАЭС-тің мемлекеттік меншікке және Агенттіктің қарамағына берілгенін атап өтті. Сондай-ақ оның баяндамасында корпоративтік басқару, тәуекелдерді басқару және комплаенс жүйелерін енгізу мәселелері қамтылды. Сондай-ақ АЭХА-мен белсенді өзара іс-қимыл жағдайында халықаралық қауіпсіздік стандарттарын ескере отырып, кадрларды даярлау орталығын құруға, мамандарды оқыту бағдарламаларын іске асыруға, өндірісті жергіліктендіруді дамытуға және ұлттық нормативтік-құқықтық базаны қалыптастыруға назар аударылды.

Қазақстан Республикасының Ұлттық ядролық орталығының бас директоры Эрлан Батырбеков 2025 жыл бойынша 5 негізгі стратегиялық бағыттағы жұмыс қорытындыларын ұсынды: атом энергетикасы саласын дамыту, басқарылатын термоядролық синтез технологияларын дамыту, Қазақстанның радиациялық қауіпсіздігі мен экологиясы, таратпау режимін қолдау, елдің атом саласын ақпараттық және кадрлық қолдау.

Одан кейін Ядролық физика институтының Астана филиалының директоры Дарын Бөргеков институттың стратегиялық мақсаттарды қолдауға, халықаралық ынтымақтастыққа және саланың кадрлық дамуына бағытталған ғылыми қызметі туралы баяндады.

Баяндамалар легін қорытындылай келе, Агенттіктің Ғылым және инновациялар Департаментінің директоры Максим Здоровец халықаралық ғылыми ынтымақтастықты одан әрі дамыту мақсатында Біріккен ядролық зерттеулер институтының Жарғысын ратификациялау қажеттілігі туралы Қоғамдық кеңесті хабардар етті.

Отырыс барысында «сұрақ-жауап» сессиясы өтіп, онда қатысушылар кадрлық даму, өндірісті локализациялау және нормативтік базаны жетілдіруді қоса алғанда, саланың өзекті мәселелерін талқылады.

Кездесу қорытындысы бойынша Қоғамдық кеңес мүшелері Қазақстандағы атом саласын орнықты дамыту үшін іс-қимылдарды одан әрі үйлестірудің, жүйелі жоспарлаудың және жоспарланған іс-шараларды дәйекті түрде орындаудың маңыздылығын атап өтті.