Қазақстан делегациясы атом энергиясын пайдаланудағы Финляндия тәжірибесімен танысты

Қазақстан Республикасы Атом энергиясы жөніндегі агенттігі төрағасының орынбасары Г.Е. Сергазиннің жетекшілігімен Қазақстан Республикасы делегациясы Финляндиядағы «Олкилуото» атом электр станциясымен танысып қайтты. Делегация құрамына Агенттіктің Атомдық қадағалау және бақылау комитетінің, «Қазақстандық атом электр станциялары» ЖШС-нің өкілдері, сондай-ақ салалық ұйымдардың мамандары кірді.

Сондай-ақ делегация Финляндияның Ядролық қауіпсіздік жөніндегі басқармасымен (STUK) жеке кездесу өткізді. Кездесу барысында атом энергиясын пайдалану саласындағы мемлекеттік реттеу мәселелері, тәуелсіз қадағалаудың рөлі және екіжақты ынтымақтастықтың болашағы бойынша тәжірибе алмасты.

Сапар барысында тараптар білім мен үздік тәжірибелер алмасудың маңыздылығын атап өтіп, жоғары халықаралық стандарттарға негізделген ұлттық реттеу жүйесін қалыптастырудың қажеттігін көрсетті. Сапар қорытындысы бойынша тараптар Қазақстанға Финляндия Президентінің биылғы жылдың күзінде жасайтын сапары аясында әрі қарайғы ынтымақтастық жөнінде меморандумға қол қоюға келісті.

Анықтама үшін:                                                          

«Олкилуото» атом электр станциясы Еуропадағы ең ірі станциялардың бірі болып табылады. Сондай-ақ бұл АЭС әлемдегі ең қуатты реакторлардың бірі болып табылады. Қуаты 1600 МВт. Станция ядролық және радиациялық қауіпсіздік саласындағы заманауи технологияларды енгізуімен, сондай-ақ пайдаланылған ядролық отынды және радиоактивті қалдықтарды жерасты қоймаларында тиімді сақтау шешімдерімен танымал. Пайдаланылған ядролық отын қоймасы 400 метр тереңдікте орналасқан және әлемде алғашқы осындай нысан болып саналады.